Situación Concello

O CONSELLO COMARCAL  DE ESQUERDA UNIDA COMPOSTELA ESIXE QUE ÁNGEL CÚRRAS ABANDONE INMEDIATAMENTE O SEU CARGO DE CONCELLEIRO.

O CONSELLO COMARCAL DE EU COMPOSTELA CULPA AO INCOMPETENTE NÚÑEZ FEIJOO DO QUE ACONTECE NA CIDADE.

O Consello Comarcal de EU Compostela, tras agardar a ver cal era a “solución” do Partido Popular para o Concello, considera que o futuro equipo de (des)goberno local é un insulto á cidadanía, carece de toda lexitimidade e rouba as veciñas e veciños o dereito a decidir democraticamente o futuro que desexa para a cidade

En primeiro lugar é inadmisible que o individuo Ángel Currás siga mancillando coa súa presenza a Administración Local, inmediatamente ten que deixar de ser concelleiro. Se a súa carencia da máis mínima decencia o aferra ao cargo que ostenta, o Partido Popular debe tomar medidas. Se non consigue que abandone o Concello debe expulsalo do grupo municipal do PP e desterralo ao grupo mixto. Pode ser que para o Partido Popular sexa lóxico que unha persoa dimita de alcalde e siga de concelleiro, ou que, como Paula Prado, dimita de voceira pero siga de deputada, pero para a maioría social, que si ten principios, é un comportamento deleznable e egocéntrico.

Polos designios do Partido Popular, non da vontade democrática da cidadanía expresada nas urnas, o futuro alcalde de Santiago será Agustín Hernández. Supoñemos que o seu turbio pasado xudicial foi un aval para que Núñez Feijoo o escollera a dedo para ser o rexedor local, ten que estar a altura do execrable nivel ético e moral que o PP local leva demostrando estes tres anos. Do que si estamos seguros e que o futuro equipo de goberno local que lidere este individuo carece de toda lexitimidade para levar a cabo as medidas que esta cidade precisa. Esiximos deste futuro (des)goberno local que non hipoteque aínda máis a futura corporación local, realmente democrática, e que simplemente cumpra cos requirimentos técnicos que o Concello precise para prexudicar o mínimo imprescindible ás veciñas e veciños.

Un dos principais culpables da situación que padece Santiago é o incompetente Núñez Feijoo. A súa covardía é cómplice de que Santiago esmoreza entre a fedenta corrupción que emana do Pazo de Raxoi. Hai que recordarlle a este personaxe que a longa noite de pedra da ditadura fascista de Franco rematou, e a dedocracia que mostra o señor Feijoo non ten o seu lugar entre a maioría social que reclama unha Democracia real, non o paripé que tanto lles parece gustar aos partidos do Réxime. Por suposto non é lexítimo, pero como é posible que sexa legal que unha cidade vaia ser (des)gobernada por persoas que non foron votadas nunha lista electoral. Esta e a súa Democracia, non a nosa.

Por suposto tamén é máis que criticable a pasividade do PSdeG ante o que acontece neste Concello. ¿é posible que realmente exista ese pacto de silencio entre PP e PSdeG, para que uns non sexan moi efusivos na súa oposición en Santiago, mentres que os outros tamén estean bastante caladiños co que acontece en Ourense ou Lugo?. Polo motivo que sexa como é posible que o partido que lidera o señor Paco Reyes, nunca estivera a favor de que a Democracia fora a solución para esta cidade. Como é posible tan nefasta e débil oposición a semellante ineptitude do PP. Realmente parece que aos partidos do Réxime o único que lles interesa é que no pastel que para eles é a democracia, o seu anaco sexa o máis grande posible. Pouco importa o benestar da cidadanía se agardando un ano máis é posible acadar máis réditos electorais. Onde está a Democracia?

Para o Consello Comarcal de EU Compostela é necesario avanzar na Democracia, que non pode ser simplemente votar cada catro anos, e por riba se ao PP e o PSdeG lles interesa que ese voto non valga para nada e os concelleiros e concelleiras sexan designados por un dedo non pola vontade popular. Hoxe máis que nunca os Concellos deben ser a vangarda no avance dunha Democracia real. É obrigatorio que a próxima corporación municipal, entre outra moitas medidas, faga realidade a Democracia Participativa e os Orzamentos Participativos