Xuntanza coa Asociación Veciñal O Seidón

O venres, ás 17h30, Iago Patiño, coordinador local de Esquerda Unida de Ames, e Xabier Ron, coordinador comarcal, mantiveron unha xuntanza con varios representantes da asociación veciñal o Seidón, a petición deste colectivo, dentro da rolda de encontros que están mantendo cos representantes políticos das diferentes organizacións.

O encontro serviu para que Esquerda Unida lles presentase á Asociación as últimas accións realizadas polo noso eurodeputado Willy Meyer ante a Comisión Europea no tocante ao vertedoiro incontrolado da Ameixenda, da inseguridade viaria na N 550 ao seu paso por Milladoiro e a indiferenza das autoridades perante a demanda social de que se constrúa un instituto en Milladoiro para formar tecido comunitario e non desarraigar aos adolescentes.

Varios foron os acordos:

1) Procurar a través do noso avogado a información sobre a parcela onde se debería situar o IES;

2) A única solución que vemos ao problema de inseguridade e tráfico na N 550 é combinar, por unha banda todo un paquete de medidas de seguridade e disuasorias en canto á velocidade coa que se cruza a localidade de Milladoiro; pola outra, non vemos terreo suficiente para a construción dunha variante, e antes de crear unha infraestrutura máis coidamos máis importante habilitar un terceiro carril na AP-9 libre de peaxe.

Esquerda Unida comprometéuse a apoiar as reivindicacións dos veciños e veciñas da Asociación O Seidón.

29-xaneiro-2008

Concentración no Toural, xoves 31 de xaneiro, ás 20h30

POLO FIN DA OCUPACIÓN SIONISTA DE PALESTINA
CONTRA A MASACRE DE GAZA


Concentración
Na Praza do Toural de Santiago de Compostela
Xoves, 31 de xaneiro, ás 20’30 horas
¡Para acabar co gueto de Gaza!

Antenas de telefonía móbil

A nosa organización política é, desde hai anos, a única que berra no deserto, a carón dos veciños e veciñas, para que se poña orde na desenfreada paxión de privatizar o aire do noso concello. De novo teñen que ser os veciños e veciñas os que alerten e amosen a súa indignación perante a inacción do Concello. No barrio da Guadalupe. Como antes en Lamas de Abade, en San Lázaro, en Concheiros, en Salgueiriños ou na Almáciga por citar lugares que saíron nos medios de comunicación censurando a actuación das operadoras e o desleixe dos nosos dirixentes.

Imos relembrar algunha das nosas máis recentes actuacións ao respecto, reproducindo os comunicados presentados á cidadanía e aos medios. Ademais, de forma sinóptica pero orientativa pódese consultar (neste mesmo blog) o programa electoral presentado nas pasadas eleccións onde constan as medidas que contemplabamos ao respecto. En tempos escriptocéntricos coma os do século XXI, non hai máis memoria que a que se mantén nas follas a través da textualidade.

Por suposto, Esquerda Unida seguirá batallando até acadar a razón: o dereito á nosa saúde e a un contorno libre de riscos.

(Doc. 1.) Esquerda Unida-IU de Santiago reclama que o goberno local non se inhiba e recurra a decisión do Tribunal Superior de Xustiza de Galicia (10 xaneiro 2007)

O auto xudicial do Tribunal Superior de Xustiza de Galicia de suspender cautelarmente o punto 2.2. da normativa “reguladora das condicións urbanísticas para a instalación e funcionamento de elementos e equipos utilizados na prestación de servicios de radiocomunicación do Concello de Santiago de Compostela” debe ser recurrida polo goberno local. Desde Esquerda Unida-IU entendemos que a decisión do Tribunal Superior ignora a marxe de prevención que se introduciu en 1993 no Tratado de Maastrich como principio. A Unión Europea recomenda aos países membros que adopten políticas de precaución.

A normativa municipal marca que entre as “escolas infantís, centros educativos, hospitais, centros de saúde, residencias xeriátricas ou parques urbanos públicos” e a instalación de antenas de radiocomunicación debe mediar unha “distancia non inferior a 100 metros”.

Desde Esquerda Unida-IU xa presentamos no seu momento unha moción para reealborar a ordenanza reguladora solicitando a ampliación a 1000 metros. Os 100 metros da normativa non son en si unha distancia excesivamente preventiva, dándose o caso de cidades europeas e españolas que xa sitúan o límite nos 200 ou incluso 500 metros de lugares habitados.

Pero unha vez aprobada a normativa e ignorada a nosa recomendación, non podemos transixir coa renuncia ao límite de 100 metros. Non podemos renunciar a unha mínima e escasa marxe de prevención. Agora, intereses de dubidosa moralidade poden indicir na afirmación (científica?) de que as ondas electromagnéticas non teñen ningunha indicencia no ser humano. Quen lles pode certificar ás catro persoas que se viron afectadas de cancro nun edificio de Canido en Ferrol que a antena de telefonía móbil que teñen no teito do seu edificio non tivo nada que ver coa súa grave enfermidade? De ter que ver, farase cargo a compañía telefónica dos gastos médicos? A ciencia aínda non pode pronunciarse de forma fiable porque as bases son inestables, pero xa dan os primeiros resultados como reflicte a Comisión Internacional para a Seguridade Electromagnética (ICEMS). Con motivo da reunións que mantivo a comisión en Benevento entre os días 22 e 24 de febreiro de 2006, os científicos refrendaron a resolución de Catania de 2002, que aconsella manter o “principio de precaución”, xa que existen “evidencias epidemiolóxicas e experimentais in vivo como in vitro” que reflicten que mesmo a exposición de campos de frecuencias extremadamente baixas pode aumentar o risco de cancro infantil e inducir problemas de saúde en persoas adultas (risco tumores cerebrais ante uso prolongado teléfonos móbiles) e, por suposto, nos nenos e nenas.

Cando transcorran algunhas xeracións, saberemos con certeza o verdadeiro alcance da exposición ás ondas electromagnéticas. Para que na nosa conciencia non existan remordementos por non ter actuado de forma cabal, Esquerda Unida-Iu reclama e esixe ao equipo de goberno local a que recurra a decisión do Tribunal Superior de Xustiza de Galicia. A nosa saúde ben merece o esforzo.

(Doc. 2) Esquerda Unida-IU saúda a decisión dos veciños e veciñas do polígono de Salgueiriños de non permitir a instalación de antenas de telefonía móbil e criticamos a indiferenza da corporación local (4 de marzo de 2007)

Unha vez máis, a cidadanía compostelá amosa ter máis cordura e empaque que a corporación municipal ao rexeitaren os veciños e veciñas dun dos bloques do polígono de Salgueiriños a instalación de antenas de telefonía móbil.

Argumento importante utilizado: a veciñanza de centros de ensino, espazos de alta sensibilidade ante a exposición de ondas electromagnéticas. En semanas anteriores, Esquerda Unida-IU esixía ao Concello que recurrise a decisión do Tribunal Superior de Xustiza de Galicia de suspender cautelarmente o punto 2.2. da normativa municipal, o principio que regulaba a distancia mínima ante espazos sensibles (principio de prevención).

Ignoramos se recurriron ou non, xa que os políticos que nos gobernan hoxe están moi pouco habituados a dialogar: no entanto, os veciños e veciñas do barrio da Almáciga durmirían máis tranquilos, xa que sobre as súas cabezas se instalaron varias antenas de telefonía móbil de forma ilegal e se ben deberían ser desmanteladas, o certo é que os veciños e veciñas afectadas contan como se poden escoitar as alarmas das mesmas perante a simple proximidade dun gato…isto é seguen operativas.

Esquerda Unida-IU, sabedora de que non se debe anular o principio de prevención, encabezada polo candidato á Alcaldía, Xabier Ron, repartiu unha serie de dípticos e entregou á Asociación Veciñal do barrio da Almáciga informes científicos (Declaración de Benevento do 2006 de expertos en ondas electromagnéticas) e normativos (Proposición de Lei francesa do 2005 que establece distancias mínimas en base ao principio de prevención) sobre a nocividade ante a exposición ás ondas electromagnéticas.

Mágoa que neste Concello non gobernen persoas como as do Concello de Huelva, que perante unha sentenza semellante do Tribunal Superior de Xustiza de Andalucía decidiron recurrir a sentenza e pelexar para tratar de controlar a actividade voraz das operadoras de telefonía móbil.

A saúde das persoas, o dereito a unha vida sá, o dereito a vivir sen medos, deberían guiar os pasos da corporación municipal e non a posible “ofensa” que se lle puidese facer a unhas empresas que, por riba, utilizan espazo público para o seu lucro.

Desde Esquerda Unida-IU reiteramos que seremos belixerantes no tocante á instalación de antenas de telefonía móbil que vulneren o principio de prevención, tal como establece a propia Unión Europea.

U-los horarios do transporte metropolitano?

Hai un ano, Esquerda Unida remitiu aos medios de comunicación diversos comunicados sobre o incumprimento reiterado do contrato das empresas que realizan o transporte metropolitano, en materia de horarios, de renovación dos autobuses para seren realmente transporte adaptado para todas as persoas e en materia de mobiliario para agardar os autobuses sen expoñerse a unha rotunda molladura, dispoñer de papeleiras para que o chan non sexa o depósito de papeis, botellas de plástico, etc.

Hoxe, un ano despois: ano novo, vellas prácticas. Nada cambiou. Nas marquesiñas unicamente reparamos nunha banda laranxa desgastada que publicita un transporte metropolitano do que ignoramos aínda frecuencias, liñas e horas de paso. Isto é, ofréce un servizo público deficiente e insuficiente.

Nesta reiterada e deliberada violación do dereito á información que ten a cidadanía, non pode valer de escusas absolutamente nada. E todos son culpables: alcaldes que decidiron acollerse a este sistema sen preocuparse -a non ser en época electoral para quedar ben na foto- e Xunta de Galicia.

Os bares estanse convertendo en improvisadas delegacións dun servizo inexistente. Pero é que hai paradas que non dispoñen nen sequera deste improvisado servizo.

De forma curiosa, os domingos, cando o ocio é máis doado de converterse en negocio, e cando as perosas dispoñen de máis tempo libre, é cando menos autobuses hai e, xa que logo, cando máis se pon a proba a paciencia das persoas.

O acceso ao ocio para persoas que viven en núcleos afastados da atractividade urbana debería ser contemplado como unha preocupación para os nosos dirixentes e pensar non en diminuir, senón cando menos en manter a mesma frecuencia que durante a semana.

Ou, é que o cambio climático só hai que combatilo durante a semana laboral?
Acaso non hai que desmotivar o uso do coche para acceder ao ocio tamén os domingos?

Os nosos dirixentes deberían pensar máis nos dereitos que temos, sobre todo cando, a inicios deste mes de xaneiro sentimos como o noso peto tremía perante o aumento de todos os indicadores de prezos básicos. A cambio, ofrécennos servizos deficitarios...

Sinaturas en contra do peche da Oficina Municipal de Atención á Poboación Inmigrante e Emigrante Retornada

Este próximo luns, ás 10h, terá lugar un acto de entrega
 de sinaturas para amosara nosa disconformidade co peche
da Oficina Municipal de Atención á PoboaciónInmigrante
e Emigrante Retornada.

O Concello de Santiago semella embarcado nunha campaña
de "modernización" (sic) que leva á privatización,
á externalización e ao deterioro dos servizos sociais.

Cando se dean conta da irreversibilidade, da inutilidade,
da malsana deformación social que provocan as súas tácticas
neoliberais....en que se escusarán?


Reproducimos de seguido o comunicado de prensa do Foro,
do que forma parte Esquerda Unida.

*******

O Foro de Inmigración composto polas asociacións e entidades
que figuran abaixo na zona de Santiago e Comarca,  convoca unha
 rolda de prensa informativa o luns día 7 de Xaneiro ás 10:00 h
diante da Oficina do Rexistro Xeral do Concello de Santiago
(Rúa Salvador Allende), previa á presentación nesa oficina de
máis de 200 sinaturas individuais que completan a solicitude
das asociacións e entidades do Foro para  que non peche
(polo tanto para esixir a súa inmediata reapertura)
a Oficina Municipal de Atención á Poboación Inmigrante e
Emigrante Retornada .
No nome deste Foro, que agrupa a asociacións de inmigrantes
e emigrantes retornados  e asociacións e entidades que prestan
 servizos á poboación inmigrante e emigrante retornada da cidade
e de moitos outros e outras veciños e veciñas da cidade que se
solidarizaron con esta causa, solicitamos a través das sinaturas e
do propio acto público de presentación das mesmas que se manteña e
mellore un servizo público municipal que custou moito conseguir a
súa posta en marcha e que as funcións que realiza na actualidade
(por exemplo, os informes de arraigo social) son imprescindibles
para os cidadáns estranxeiros ou emigrantes retornados da cidade
e para moitas outras persoas interesad@s en contratar traballadores
ou traballadoras inmigrantes ou en realizar  outros tipos  de
 consultas, xestións, etc. Por outra banda, as asociacións e
entidades deste Foro entendemos que as traballadoras que viñan
desenvolvendo o seu desempeño profesional nesta Oficina
realizaban un excelente traballo e que deben continuar,
preferiblemente en condicións laborais menos precarias,
no seu labor profesional.
Compre tamén, ao contrario do que vimos denunciar no acto público
 que presentamos, mellorar os recursos humanos e materiais
da devandita Oficina, polo aumento continuado da poboación á
que debe dar servizos a mesma. O retraso na renovación do
convenio coa Secretaria Xeral de Emigración non
debe servir de desculpa para xustificar  o non mantemento de
forma continuada, como un servizo público municipal importante,
 desta Oficina e das súas traballadoras. 

U-la participación cidadá?

Aínda non tivemos ocasión de poder comprobar se as alegacións que presentamos ao Regulamento foron tidas en conta ou non -supoñemos que non, porque así é a democracia imperfecta da Democracia Representativa-.

En calquera caso, cómpre que os políticos e as políticas de turno, os e as que nos gobernan, se saquen esa máscara de hipocrisía e admitan xa, ao igual que fixeron os eurodeputados socialistas logo do tratado de Lisboa, que lles importa un pemento o que opine ou non a cidadanía e menos aínda a súa participación.

Unha organización pequena como a nosa, sen representación institucional, ás veces, ten a sensación de remar contra o vento, pero desde a modestia hai razóns poderosas que se erguen con forza, e dificilmente son derrubables, a honestidade e o esforzo no traballo cotiá.

Non é doado sabelo, pero ese traballo non obedece a persoas que están liberadas e cobran un salario, senón ás horas de militancia que extraemos do día despois de traballar. Por iso, por moito que o queiran, non calaremos, e facemos noso o manifesto brelián, sempre estaremos á procura da xustiza social e da igualdade de oportunidades.

A política de prezos do Concello é para tremer. Optan por xogar co peto do día a día, cos impostos indirectos, en troques de reivindicar na Xunta e no Estado que os municipios teñan dereito a máis pastel da tarta que reparte o Estado: loitar por ese 30 por cento cando menos para dar resposta aos retos que soporta a política municipal.

Non é polo camiño das plusvalías que reporta a construción -esgotarase-, nin mediante os impostos indirectos. A redistribución da renda -vexamos o modelo finlandés- comeza polos impostos directos, onde aquel que máis ten, máis debe pagar. Pero non. Este país, esta sociedade camiñan da man dun hiperindividualismo e hiperconsumismo devorador e vemos como a clase empresarial se volve -de facto- unha delincuencia organizada ao afirmar un 46% que é razonable a fraude fiscal.

Mentres, temos o que nos merecemos? Ás veces, a resposta é tan sinxela como dicir que si.

Ou é alienación debido á roda do capital (doutro xeito non se pode chamar a escoitar que imos tirar a casa pola ventá o día de fin de ano e logo queixarnos da costa de xaneiro)? Desinterese? O goberno duns poucos para -perdón, sobre- a maioría? Un pouco de todo isto e máis?

A taxa de abstención seguirá aumentando, a menos que se vexa que esta forma de facer política é nociva. É lesiva para os intereses da maioría social. É obstrucionista para a real participación e coresponsabilidade na toma de decisións que máis afectan á vida dun pobo.

COMUNICADO DE APOIO E SOLIDARIEDADE Á FAMILIA DE IRENE FERNÁNDEZ E DOS VECIÑOS E VECIÑAS DE MILLADOIRO

Esquerda Unida-IU da comarca de Compostela e o Consello Local de Ames desexan manifestar co presente comunicado en primeiro lugar o noso máis sinceiro pésame e todo o seu ánimo para a familia da nena Irene Fernández, falecida despois dun atropelo na Avenida Rosalía de Castro da localidade de Milladoiro. En segundo lugar, desexamos comunicar que poñemos a disposición da familia afectada todos os recursos dos que dispón Esquerda Unida-IU, incluído o seu gabinete de recursos xurídicos. Finalmente, manifesta que estará cos veciños e veciñas de Milladoiro na concentración pacífica de máñá mércores ás 19h

É triste que sempre teñan que acontecer sucesos tráxicos para que as autoridades competentes tomen nota e se apliquen na tarefa de poñer remedio á situación insostible de falta de seguridade viaria que sofre a localidade de Milladoiro. Ao longo do día, os veciños e veciñas de dita localidade ven como milleiros de vehículos cruzan a Avenida de Rosalía de Castro, convertida en estrada nacional dirección a Pontevedra ou Santiago. Por iso, o chamado que realiza a asociación veciñal Seidón de circunvalación, reurbanización e desvío de tráfico pesado da avenida é un chamado á simple lóxica que desde Esquerda Unida-IU respaldamos.

Santiago, 11 de decembro de 2007

Martes 18 de decembro, concentración pola dignidade. Os fascistas non pasarán

PORQUE NON PASARÁN OS FASCISTAS

Martes 18 de decembro, concentracións en Santiago e Coruña, ás 20h

Vivimos tempos convulsos nos que abrolla e xa se visuaLiza o comportamento xenófobo de grupos ultras e de ideoloxía fascista e filonazi. Tempos nos que se culpa de todo o malo ás persoas migrantes e só son valoradas en termos numéricos en relación á cantidade de cotizantes de Seguridade Social, obviando os valores hamanos e sociais.

Pero son tempos de claro racismo institucional, xa que, como levamos denunciado desde hai anos, temos unha dura lexislación de estranxeiría e que, de prosperar a iniciativa presentada no Senado por Coalición Canaria [apoiada por CIU e polo PP -o que sinala con quen dialogan algúns grupos nacionalista que se auto-proclaman "de esquerdas" (sic)], se convertiría nunha verdadeira lei de escurantismo e negación de dereitos.

Por iso, o Foro Galego de Inmigración, ao que nós pertencemos desde a súa fundación, anima ás persoas desexosas de loitar por un mundo mellor, por un mundo onde a persoa se eleve sobre o abafo do capital a que apoien coa súa presenza ás persoas inmigrantes.

Están previstas dúas grandes concentracións, unha na Praza do Toural en Compostela, ás 20h; outra, á mesma hora, pero na praza coruñesa de María Pita.

Esquerda Unida-IU presenta aos medios a petición e pregunta sobre o vertedoiro incontrolado de Ames ante o Parlamento Europeo

Hoxe, venres 7 de decembro de 2007, ante os medios de comunicación, tivo lugar na sede comarcal de Esquerda Unida-IU unha rolda de prensa na que o coordinador comarcal, Xabier Ron, e o coordinador local de Esquerda Unida-IU de Ames presentaron as iniciativas que se levaron ao Parlamento Europeo os días 28 e 29 de novembro.

O coordinador comarcal, Xabier Ron, realizou unha valoración moi positiva do traballo desenvolvido pola agrupacón comarcal de Esquerda Unida e en particular no bo traballo levado a cabo pola agrupación local que coordina Iago Patiño.

A preocupación polo noso contorno, pola preservación da nosa saúde medioambiental e persoal figura como impulso de todo o traballo que hoxe presentou Esquerda Unida antes os medios presentes. O vertedoiro incontrolado de Ames supón un grave risco para a saúde dos habitantes de Ames e veciños. Por iso, os pasados 28 e 29 de novembro, Esquerda Unida de Ames, da man de seu coordinador Iago Patiño, presentou unha petición “ao parlamento europeo co obxecto de chamar a súa atención sobre o impacto ecolóxico e medio ambiental a causa do incumprimento por parte do goberno autonómico e concello local en relación ao peche e selado dun vertedoiro incontrolado na comunidade autónoma de Galicia e para que requira información ao respecto e tome posición ante esta problemática”.

Esquerda Unida felicítase porque dita petición xa foi sometida a consideración da Comisión Europea mediante as preguntas que Willy Meyer, eurodeputado da GUE-NGL (Gauche Unitaire Européenne-Gauche Verte Nordique), presentou o día 3 de decembro ante a Comisión de Peticións.

Iago Patiño realizou unha cronoloxía dos feitos, feitos que subliñan a contradición inherente ao PSdG, xa que, cando estaba na oposición, chegou a formular unha iniciativa parlamentaria demandando o peche do vertedoiro incontrolado de Ames, mentres que desde que goberna a súa actitude foi de demora e de desleixe. Iago Patiño salientou que en ningún momento o grupo de goberno do concello de Ames, tanto cando era rexido polo bipartito PSdG-BNG, como agora que é rexido polo PSdG, tivo a ben responder ás numerosas iniciativas que a nosa organización política lle presentou.

A rolda de prensa finalizou co desexo de que a Comisión de Peticións se posicione e que, a raíz destra iniciativa, se poña fin a unha situación de vulneración da Directiva marco 75/442/CEE sobre tratamentos de residuos, vulneración que pon en perigo á saúde medioambiental e persoal da poboación de Ames.

Consello Comarcal de Esquerda Unida-IU, 7-12-2007.