Para a Área de Mulleres de Esquerda Unida
Compostela Nos tempos que corren de retroceso en dereitos e liberdades, desde o
feminismo seguimos loitando, para que o avance na igualdade real entre homes e
mulleres non siga sendo unha quimera, e pase a ser un referente central de
loita en todas e cada unha das nosas accións políticas.
Ante a ameaza de regresión continua e permanente
no noso dereito a decidir libremente sobre a nosa maternidade; ante a ausencia
de políticas efectivas contra Violencia de Xénero; ou ante a discriminación e
explotación laboral e salarial das mulleres; o noso posicionamento é: impregnar
a nosa axenda política e social, dun profundo contido feminista..
Dende a Área de Mulleres de EU Compostela
propoñemos ao Pleno do concello de Santiago a seguinte proposta de.
MANIFESTO:
Ante a reforma do Dereito ao Aborto;
defendemos unha lei sobre interrupción voluntaria do embarazo na que se
contemple, como mínimo, a prevención contra os embarazos non desexados cunha
educación sexual que percorra todos os estadios educativos; unha lei que
permita ás mulleres interromper o seu embarazo na sanidade pública no momento e
polas razóns que desexe, sen restricións, sen prazos e sen tutelas; unha lei
que elimine o aborto voluntario do código penal tanto para as mulleres como
para as e os profesionais sanitarios que o practican.
Ante a imposición da custodia compartida;
este Pleno rexeita a mesma, cando é unha medida xudicial imposta sen o acordo
de ambos os proxenitores, xa que o único que se consegue é impor unha obriga de
continuo contacto e relación entre dúas persoas, o pai e a nai, que é vivida
con rexeitamento polo menos por unha delas, repercutindo en moitos casos nun
ambiente de crispación e de hostilidade que prexudica ao desenvolvemento persoal
das fillas e fillos; polo que a custodia compartida, só debería contemplarse
naqueles casos que ambos proxenitores estean de acordo, e preservando sempre o
interese das e dos menores que é o ben xurídico a protexer. Non podéndose
outorgar, ademais, en caso de Violencia de Xénero.
Ante a violencia machista; apostamos polas
políticas municipais/territoriais de prevención, onde un alicerce fundamental é
unha educación afectivo-sexual a todos os niveis que facilite desenvolver
relacións baseadas no respecto e a igualdade real entre mulleres e homes; a
violencia de xénero é unha expresión extrema da desigualdade que se manifesta
de múltiples formas e que percorre a vida de todas as mulleres, en maior ou
menor medida; non podemos desterrar a violencia contra as mulleres sen socavar
as estruturas discriminatorias que percorren as nosas sociedades; polo que
desde o Concello comprometémonos a non reducir senón a reforzar os recursos
económicos e humanos destinados á implantación de políticas de igualdade
activas, integrais e participativas.
Ante a discriminación e explotación
laboral das mulleres; esiximos que se asenten as bases de desenvolvemento do
noso atacado Estado de Benestar, xerando por parte do Concello emprego de
calidade e eliminando os obstáculos que imposibilitan o logro da autonomía
persoal e económica, das mulleres.
É imprescindible democratizar a nosa
sociedade, desterrando desigualdades e fomentado a participación activa de
mulleres e homes, desde unha convencida aposta polo feminismo como alicerce básico
desta transformación.
No hay comentarios:
Publicar un comentario