lunes, 9 de noviembre de 2015

Denuncia alianza PP-PSOE



O CONSELLO COMARCAL  DE ESQUERDA UNIDA COMPOSTELA DENUNCIA O ATAQUE AO BENESTAR QUE DECRETA O SUICIDIO ECONÓMICO DO CONCELLO.

EU COMPOSTELA APOIA A PROGRESIVIDADE FISCAL QUE PROXECTA COMPOSTELA ABERTA NECESARIA PARA PODER APLICAR POLÍTICAS SOCIAIS

O Consello Comarcal de Esquerda Unida Compostela manifesta a súa máis firme repulsa á alianza estratéxica e antisocial perpetrada polo PSOE e PP que, por desexar desgastar a un equipo de goberno, opta por hipotecar o futuro económico do Concello e imposibilitar o desenvolvemento de políticas sociais para que todos os veciños e veciñas teña a mesma igualdade de oportunidades.

Os intereses sectarios e estratéxicos dos partidos do réxime -abafados pola corrupción e reféns dos poderes económicos- deseñaron o obxectivo de atacar á veciñanza compostelá. A demagoxia, o populismo e o electoralismo explican o proceder das forzas do réxime. O acontecido hoxe no Pleno amosa claramente que nin o dedocrátrico exalcalde, Agustín Hernández, nin Paco Reyes, cadáver político que levou ao PSOE ao seu peor resultado democrático, velan polo benestar da maioría social, xa que o seu único fin é atacar e evitar o traballo das concelleiras e concelleiros de Compostela Aberta.

viernes, 14 de agosto de 2015

Alegacións presentadas aos PGE 2016



O CONSELLO COMARCAL  DE ESQUERDA UNIDA COMPOSTELA PRESENTA ALEGACIÓNS AOS PGE 2016 POR IMPORTE DUNS 15 MILLÓS DE EUROS.

O CONSELLO COMARCAL DE EU COMPOSTELA DEMANDA MAIORES RECURSOS PARA MANTEMENTO E CONSTRUCIÓNS DAS INFRAESTRUTURAS QUE SANTIAGO PRECISA.

O Consello Comarcal de Esquerda Unida Compostela, a través do grupo parlamentario de Izquierda Unida, presenta alegacións aos PGE 2016 ante a necesidade de investimentos que precisa Santiago e a súa comarca.

Entre as alegacións presentadas está a necesidade de executar, coa maior rapidez posible, a construción da nova depuradora. Por desgraza é evidente que a día de hoxe a situación que padece a nosa comarca supón un risco medio ambiental e de saúde público. Por tal motivo esiximos un adianto da contía prevista para o 2017 para o ano 2016, e poder así contar canto antes coa depuración de augas que precisamos.

Para o Consello Comarcal de EU Compostela un novo modelo sustentable económica e medioambiental de transporte público e máis necesario que nunca. Tanto o tren como o autobús teñen que ter un rol determinante neste novo modelo que se debe levar a cabo. Por iso demandamos, nas alegacións presentadas, que se dote debidamente  tanto a construción da estación intermodal, na que o tren de proximidade e diferentes liñas de autobús urbano, interurbano e de largo de recorrido sexan una realidade o antes posible, como o estudo para facer real un plan global de mobilidade sustentable.

miércoles, 10 de junio de 2015

Vulneración de dereitos das persoas maiores no centro sociocomunitario "Porta do Camiño"



O CONSELLO COMARCAL DE ESQUERDA UNIDA COMPOSTELA DENUNCIA A ACTUACIÓN NEGLIXENTE DA XUNTA DE GALICIA CON RESPECTO AO CENTRO SOCIOCOMUNITARIO “PORTA DO CAMIÑO” DA NOSA CIDADE

O INFORME DO VALEDOR DO POBO DO ANO 2014, PRESENTADO ONTE NO PARLAMENTO DE GALICIA, REFLICTE A VULNERACIÓN DE DEREITOS DAS PERSOAS MAIORES E AS DRAMÁTICAS CONSECUENCIAS DOS RECORTES EN POLÍTICAS SOCIAIS

O Consello Comarcal de Esquerda Unida Compostela denuncia, unha vez máis, as políticas de recortes que seguen xerando situacións dramáticas e discriminatorias na sociedade galega, tal e como mostra o Informe do Valedor do Pobo do ano 2014, presentado onte no Pleno do Parlamento de Galicia.

Entre outras vulneracións de dereitos, o ano pasado a Xunta de Galicia atacou especialmente ás persoas maiores usuarias do Centro sociocomunitario situado na Residencia de maiores “Porta do Camiño”, na nosa cidade.

Dende hai anos, as persoas usuarias do centro sociocomunitario  (chegaron a ser case 200) viviron a paseniña redución de actividades ocupacionais (coro, teatro, manualidades, …) pero o ano pasado sufriron  a supresión de todas as actividades que se viñan realizando co financiamento da Xunta (obradoiros de prevención de dependencia, memoria, psicomotricidade,…) permanecendo de xeito gratuíto só as actividades impartidas por persoas maiores voluntarias e pola Fundación La Caixa. A Xunta privatizou as outras actividades nunha empresa, o que supuxo o copago para as persoas usuarias, a maioría das cales non poden asumir o custo das mesmas.

martes, 12 de mayo de 2015

Acto Pontepedriña



MARÍA ROZAS MANIFESTA QUE OS ORZAMENTOS SON O CORAZÓN QUE DA VIDA A UNHA CIDADE DE TODAS E PARA TODAS AS PERSOAS, AS VECIÑAS E VECIÑOS CODECIDIREMOS COMO DEBE INSVESTIR O CONCELLO OS CARTOS PÚBLICOS.

COMPOSTELA ABERTA TEN PROPOSTAS, NON VACUAS PROMESAS, PARA REVITALIZAR A VIDA COLECTIVA NOS BARRIOS.


Martiño Noriega e María Rozas, xunto con Xan Duro, proseguindo cos encontros con distintos barrios da cidade, escoitaron as propostas e queixas que manifestaron as veciñas e veciños de Pontepedriña.

CA propón no seu programa recuperar os barrios para a veciñanza, é necesario dotalos de espazos públicos que faciliten a vida colectiva. Dende o parque infantil ata a mellora do CSC, Pontepedriña debe beneficiarse de medidas que colaboren a satisfacer as demandas expresadas polas veciñas e veciños.

Para María Rozas “as persoas que decidimos formar parte de CA o fixemos polo compromiso de poder facer as cousas doutra maneira, móvemos a ilusión por recuperar o Concello para a maioría social, facendo propostas concretas e posibles, non vacuas promesas”.

lunes, 11 de mayo de 2015

Acto San Xoán de Fecha



NOA MORALES SÁNCHEZ MANIFESTA O COMPROMISO DE COMPOSTELA ABERTA COAS MELLORAS QUE O RURAL DE SANTIAGO PRECISA .

A DESCENTRALIZACIÓN DOS SERVIZOS MUNICIPAIS E UN TRANSPORTE PÚBLICO EFICAZ E EFICIENTE SON EIXOS FUNDAMENTAIS DESTE COMPROMISO.


Noa Morales Sánchez, xunto con Rafa Peña, participou nun novo encontro de CA coa veciñanza do rural, nesta ocasión escoitáronse as demandas de San Xoán de Fecha.

Certificouse, unha vez máis, que as veciñas e veciños das parroquias padecen serias carencias. É inadmisible que pese a pagar por eles, cunha carga impositiva similar ás persoas que viven no centro da cidade, os servizos aos que teñen dereito non cubren as súas necesidade

Xa sexa o transporte público, saneamento ou, por exemplo, o mantemento das infraestruturas é necesario, a través da participación cidadá, acometer plans de actuacións específicos para o rural co fin de garantizar o benestar da veciñanza.

Acto en Figueiras



MARÍA ROZAS MANIFESTA QUE COMPOSTELA ABERTA PRESENTA UN EQUIPO PARA GOBERNAR, CON PERSOAS CON EXPERIENCIA PARA CADA EIDO DA XESTIÓN MUNICIPAL.

O RURAL EXISTE E CON COMPOSTELA ABERTA OUTRA FORMA DE GOBERNAR É POSIBLE, RESPETANDO OS DEREITOS DE TODAS AS VECIÑAS E VECIÑOS.


Martiño Noriega e María Rozas participaron no encontro de Compostela Aberta coa veciñanza de Figueiras, comprobando, como en anteriores encontros, o abandono que padece o rural de Santiago.

É necesario, a través da participación cidadá, elaborar plans de actuación para corrixir as deficiencias que padece a xente que vive nas parroquias. Infraestruturas, saneamento, transporte público, mantemento, internet e todo o que sexa preciso para respectar os dereitos das veciñas e veciños teñen que ser executados paulatinamente.

María Rozas expuxo que “CA presenta unha candidatura para ter un equipo de goberno ao servizo da cidadanía, debemos recuperar o Concello, temos que gañar Compostela”. Ante estes catro anos de nefasta xestión do Partido Popular “as persoas que dimos o paso de participar nestas lista encabezada por Martiño o facemos por honestidade, por compromiso, porque creemos que outra forma de gobernar é posible”

sábado, 9 de mayo de 2015

Actos en Marantes e Carballal



MARÍA ROZAS DENUNCIA A DEFICIENTE FINANCIACIÓN PARA O RURAL DE COMPOSTELA, OS ORZAMENTOS MUNICIPAIS NON SATIFACEN AS DEMANDAS DAS VECIÑAS E VECIÑOS.

É NECESARIA, ENTRE OUTRAS MEDIDAS, A DESCENTRALIZACIÓN DE SERVIZOS E UN PLAN DE MOBILIDADE SUTENTABLE QUE ATENDA ÁS NECESIDADES DA VECIÑANZA.


María Rozas, xunto con Jorge Duarte e Rafa Peña, participou nos encontros de Compostela Aberta coa veciñanza de Marantes e Carballal, escoitando as distintas propostas e denuncias que dende o rural compostelá manifestan.

A descentralización de servizos, entre outras, é unha das medidas que se consideran necesarias para mellorar a realidade das parroquias. Recuperar as antigas oficinas de Enfestas na que, por exemplo, prestar servizos de asesoramento xurídico, axudaría a mellorar a situación de vida das veciñas e veciños, sentíndose parte o concello non cidadanía de segunda.

María Rozas denunciou que “os orzamentos municipais rexistran un investimento de 35,8 euros por habitante no rural, cando para a zona urbana é de 153 euros por habitante”. Acreditando a enorme diferenza na prestación de servizos que padecen as persoas que viven nas parroquias de Santiago, sendo necesario un plan de actuación que atenda as súas demandas.

jueves, 30 de abril de 2015

Apoio Feira Primavera de San Pedro



O CONSELLO COMARCAL  DE ESQUERDA UNIDA COMPOSTELA CENSURA A ACTITUDE DO CONCELLO COA ASOCIACIÓN DE FESTAS DO BARRIO DE SAN PEDRO.

O CONSELLO COMARCAL DE EU COMPOSTELA CRITICA QUE O CONCELLO PAREZA ESTAR BUSCANDO DAÑAR AS ACTIVIDADES DE BARRIO E OS ATRACTIVOS TURÍSTICOS DA CIDADE.

Durante estes catro anos, dende o Consello Comarcal de Esquerda Unida Compostela vimos denunciando os constantes atropelos do Concello. Dende lexislacións municipais restritivas ata a súa endémica corrupción, estes catro anos son catro anos perdidos para a cidade, catro anos de desgoberno e mofa.

Agora, cando esta lexislatura remata e hai posibilidades de cambio, parece que o Partido Popular quere morrer matando, e agora o seu obxectivo foi a Feira de Primavera de San Pedro. A Comisión de Festas de dito Barrio vén de denunciar que o Concello déixaos sen acceso ás tomas de luz, supostamente por impedimentos legais, perigando así os concertos e iluminación da festa.

Coma de costume, o PP e o alcalde da cidade, Agustín Hernández, buscan eludir as súas responsabilidades e facer o que se lles antolle, en lugar de poñerse a traballar para solucionar esta problemática que non é menor, posto que a Feira da Primavera é un acontecemento moi coñecido na cidade e arredores e supón un beneficio económico moi importante para as persoas que residen e traballan nese barrio.

viernes, 24 de abril de 2015

Moción polo 26A, Día Visibilidade Lésbica



Por oitavo ano consecutivo, os movementos LGTBI (movemento de lesbianas, gais, transxénero, bisexuais e intersexuais) e feministas do Estado reivindican o día 26 de Abril como o Día da Visibilidade Lésbica.

A multiplicidade de identidades con que cada persoa se identifica, sitúannos nun lugar determinado do escalafón social. Así, aquelas identidades menos privilexiadas polo sistema, teñen cotas maiores de vulnerabilidade. Por iso, algunhas características identitarias como a orixe étnica, a clase, a identidade de xénero, a orientación sexual ou os tipos de diversidade funcional, son cruciais para a posición social que ocupa cada persoa. E iso é algo do que calquera goberno debe facerse cargo, así, os avances logrados en materia de igualdade non poden opacar as múltiples formas de discriminación que prevalecen tanto na sociedade como nas institucións.

E é que aínda queda moito que reivindicar para as lesbianas, pois, do mesmo xeito que o patriarcado fai mella na sociedade dificultando que as mulleres logren unha igualdade de facto con respecto aos homes, as lesbianas enfróntanse a máis discriminacións e barreiras: en principio, ademais de por mulleres, discriminadas porque a súa orientación sexual lévaas a vivir a súa sexualidade á marxe dos homes.

jueves, 16 de abril de 2015

Apoio ás traballadoras e traballadores de Blanco



O CONSELLO COMARCAL  DE ESQUERDA UNIDA COMPOSTELA MOSTRA O SEU APOIO AS TRABALLADORAS E TRABALLADORES DE BLANCO.

O CONSELLO COMARCAL DE EU COMPOSTELA ANIMA A PARTICIPAR NA MOBILIZACIÓN DE APOIO ÁS PERSOAS DESPEDIDAS QUE TERÁ LUGAR O VENRES 17 DE ABRIL ÁS 12:00 DIANTE DA TENDA DE BLANCO EN XENERAL PARDIÑAS.

O Consello Comarcal de Esquerda Unida Compostela reitera a súa defensa dos dereitos da clase traballadora, que baixo a escusa da crise-estafa que padecemos sofren o ataque constante das políticas neoliberais que procuran a súa desaparición.

É máis que evidente, grazas as medidas empezadas polo PSOE e acrecentadas polo PP, que, hoxe en día, abandonamos calquera tipo de seguridade laboral por una neoescravitude, na que as persoas non son máis que meros instrumentos ao servizo do lucro duns poucos.

miércoles, 15 de abril de 2015

Discurso pola República de Noa Morales



Hoxe, 14 de Abril, conmemórase o 84 Aniversario da proclamación da II República, feito que constituye para toda a xente de progreso unha oportunidade de recoñecer os avances sociais e democráticos que representou.

A República significou o impulso da cultura e da educación, do dereito ao traballo como eixo fundamental da acción política, do rexeitamento da guerra como instrumento diplomático, da aposta por dignificar as condicións de vida no agro do rexeitamento da influencia da igrexa ou da banca na vida cotiá das xentes e a defensa dos dereitos das mulleres que hoxe queremos destacar.

O actual governo lexisla en contra das mulleres, disminuiu no presuposto os orzamentos para loitar contra a violencia machista, foron partícipes dunha involución nos dereitos das mulleres, como o aborto ou son cómplices do crecente empobrecemento das mulleres.

"Viva a República" verbas de Abuín polo 14 de Abril



¡EU QUERO SER CIDADÁN, NON SUBDITO!

A monarquía é unha anacronía. Son republicano convicto. Por raciocinio. Por raciocinio todos debésemos ser republicanos convictos. Porque todos nacemos iguais de sangue. Non hai sangue de distintas cores ou de clases distintas. Todas as sangues son plaquetas, glóbulos roxos e glóbulos brancos. Non hai ámbitos no sangue para matices de signo cromático nin para matices de signo divino. A suposta existencia de sangue azul é unha falacia interesada que bate contra todo indicio de raciocinio. Non fai falta ser hematólogo para dar por sentado que non hai sangues de alta e baixa liñaxe.

Os que din que si existen matices de signo cromático e matices de signo divino dino movidos por interese de parte. Falso de toda falsidade é ese dito interesado. As monarquías son unha entelequia desde que a revolución francesa as envorcou en 1789 ó cemiterio da Historia. E Alfonso XIII tivo que escapar de España a uña de cavalo en 1931 por golfo. Cousa que sucedeu sen que correse unha pinga de sangue. A impopularidade da monarquía era tal que o propio monarca optou por collelo portante.

viernes, 6 de marzo de 2015

Manifesto polo 8 de Marzo



Para a Área de Mulleres de Esquerda Unida Compostela Nos tempos que corren de retroceso en dereitos e liberdades, desde o feminismo seguimos loitando, para que o avance na igualdade real entre homes e mulleres non siga sendo unha quimera, e pase a ser un referente central de loita en todas e cada unha das nosas accións políticas.

Ante a ameaza de regresión continua e permanente no noso dereito a decidir libremente sobre a nosa maternidade; ante a ausencia de políticas efectivas contra Violencia de Xénero; ou ante a discriminación e explotación laboral e salarial das mulleres; o noso posicionamento é: impregnar a nosa axenda política e social, dun profundo contido feminista..

jueves, 19 de febrero de 2015

Xuntanza coa AV de San Pedro A Xuntanza



REPRESENTANTES DE ESQUERDA UNIDA COMPOSTELA REÚNENSE COA A.V. A XUNTANZA PARA A ELABORACIÓN COLECTIVA DO PROGRAMA POLÍTICO DAS MUNICIPAIS

O CONSELLO COMARCAL DE EU COMPOSTELA REITERA A NECESIDADE DE ARTICULAR OS MECANISMOS DE INFORMACIÓN E PARTICIPACIÓN, PARA QUE AS VECIÑAS E VECIÑOS SEXAN PARTÍCIPES Á HORA DE BUSCAR SOLUCIÓNS PARA O SEU BARRIO.

Os representantes do Consello Comarcal de Esquerda Unida Compostela, José María Tubío e Vicente Vázquez, mantiveron un encontro coa AV A Xuntanza, dentro do programa de visitas ao tecido asociativo da cidade para coñecer de primeira man as necesidades do barrio e no proceso participativo de elaboración colectiva do programa das municipais de maio do 2015 .

Consideramos labor prioritaria do Concello fomentar a participación da veciñanza nas actividades que incumban ao seu barrio e establecer espazos e instrumentos para os procesos de reclamacións e suxestións.

Dende o Consello Comarcal de EU Compostela apoiamos a demanda dun Centro Socio Cultural no barrio de San Pedro. É necesaria a construción dun espazo publico con salón de actos e outras salas habilitadas para dar servizo ás diferentes actividades do barrio. Reiteramos tamén o noso apoio á proposta de converter o CSC da Trisca nun lugar destinado ás persoais maiores contribuíndo a que teñan unha vida autónoma e enriquecedora.

jueves, 12 de febrero de 2015

Contra a falta de ética do PP



O CONSELLO COMARCAL  DE ESQUERDA UNIDA COMPOSTELA LAMENTA A FALTA DE ÉTICA E MORAL QUE REXE O (DES)GOBERNO LOCAL DO PP, UN INSULTO PARA A VECIÑANZA

O CONSELLO COMARCAL DE EU COMPOSTELA DENUNCIA AS ACTITUDES DESPÓTICAS E A INEPTITUDE ABSOLUTA DUN EQUIPO DE GOBERNO NON ELEXIDO POLO POBO

O Consello Comarcal de Esquerda Unida Compostela, ante as últimas novas da sentenza do TSXG e a imputación de Reyes Leis, quere denunciar a carencia máis absoluta de ética do actual equipo de goberno do PP en Compostela e a lousa que representa para as arcas públicas, con claras implicacións para a veciñanza.

A corrupción e as súas consecuencias seguen ben instaladas no Pazo de Raxoi, onde un equipo de goberno, de raigame dedocrática, non elixido pola veciñanza, segue hipotecando o futuro da cidade. A sentenza do TSXG, que obriga a repoñer nos seus cargos ao secretario e interventor, implica unha emenda á totalidade aos procedementos do PP que lonxe de respectar a profesionalidade do persoal funcionario, optara por impoñer a súa política clientelar. Esta circunstancia, ademais, implica un custe para as arcas públicas que algunhas fontes cifran en máis de 500.000 euros. Trátase dun desbaldimento inasumible de diñeiro público.

Hoxe mesmo coñecíamos que a unha concelleira electa que segue, e que fachendeaba de non estar inmersa en ningunha causa como imputada, Reyes Leis, vén de ser imputada por presunto tráfico de influencias. Feito este que redunda na carencia de lexitimidade do PP para seguir gobernando o destino dos veciños e veciñas de Compostela.

lunes, 2 de febrero de 2015

Xuntanza coa AV de Pelamios As Brañas de Andrés



REPRESENTANTES DE ESQUERDA UNIDA COMPOSTELA REÚNENSE COA A.V. AS BRAÑAS DE ANDRÉS PARA ATENDER ÁS DEMANDAS VECIÑAIS DE MELLORA DO BARRIO

O CONSELLO COMARCAL DE EU COMPOSTELA DENUNCIA A INCOMPETENCIA DUN CONCELLO SOMETIDO AOS INTERESES ELECTORALISTAS DO SEU ALCALDE

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AV As Brañas de Andrés proseguindo cos encontros co tecido asociativo e veciñal da cidade para coñecer de primeira man as necesidades dos barrios e parroquias do municipio ao mesmo tempo que facelo partícipe do proceso de elaboración colectiva do programa das municipais de maio do 2015.

Unha vez máis queda claro que os intereses electoralistas de Agustín Hernández, alcalde dedocrático de Compostela, están privando aos barrios tradicionais de Compostela dos elementos necesarios para a cohesión social e territorial. A veciñanza experimenta que non recibe o mesmo trato ca outras zonas da cidade, consideradas prioritarias para un equipo de goberno preocupado, unicamente, pola cita electoral de maio de 2015.

miércoles, 28 de enero de 2015

Petición de asilo político para Hassanna Aalia



O pasado 19 de xaneiro fíxose público o auto de resolución da solicitude de asilo político en España do mozo activista saharaui Hassanna Aalia, no que se lle comunica a denegación da protección e anúnciaselle a saída obrigatoria do territorio español, dándolle un prazo de 15 días para abandonar o Estado español, pese ao castigo que lle espera e o risco real de ser torturado si regresa ao Sahara Occidental baixo ocupación de Marrocos.

Hassanna é un mozo saharaui de 26 anos nado no Aaiún que solicitou o asilo político en xaneiro de 2012, tras decatarse que o seu nome figuraba na relación de acusados que ían ser xulgados en Rabat por un Tribunal Militar polos feitos do Gdeim Izik. Hassanna estaba nese momento en España, non por estar perseguido polo seu activismo en favor da causa saharaui, senón para estudar cunha beca que lle foi concedida para aprender español. A lei española que regula as condicións para a solicitude de asilo político establece cláusulas e prazos excepcionais cando as circunstancias que xustifican a petición débanse a causa sobrevida no país de orixe, como sucedeu neste caso.

Hassanna Aalia figura no Sumario de Instrución do Tribunal Militar Permanente para a Forza Armada do Reino de Marrocos, xunto con outros 24 acusados, todos civís. Foi xulgado en rebeldía e a tenor da súa condena a cadea perpetua nunha sentenza que foi lida ante observadores de Human Rights Watch e Amnistía Internacional, entre outros, existen sobrados motivos para determinar que o retorno de Hassanna ao Sahara Occidental suporía un risco real para a súa integridade física.

martes, 27 de enero de 2015

Xuntanza coa AV Pontepedriña



ESQUERDA UNIDA COMPOSTELA REÚNESE COA A.V. PONTEPEDRIÑA PARA A ELABORACIÓN COLECTIVA DO PROGRAMA POLÍTICO DAS MUNICIPAIS

O CONSELLO COMARCAL DE EU COMPOSTELA DEFENDERÁ UNHA MELLOR PLANIFICACIÓN DOS USOS DOS ESPAZOS PÚBLICOS E UNHA POLÍTICA  DE CALIDADE DA MOBILIDADE E DA ACCESIBILIDADE DO BARRIO.

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AV Pontepedriña, dentro do programa de visitas ao tecido asociativo da cidade para coñecer de primeira man as necesidades do barrio e facelo partícipe no proceso de elaboración colectiva do programa das municipais de maio do 2015 .

Son numerosas as eivas do barrio que seguen manifestándose ano tras anos, debido a un concello ineficaz, distanciado dos barrios tradicionais. O Concello semella ollar os resultados das pasadas eleccións municipais á hora de facer política municipal. Os veciños e veciñas do barrio non merecen esta actitude electoralista.

Beirarrúas non axeitadas, non accesibles, que dificultan o transito de persoas maiores ou con problemas de mobilidade; problemas de mobilidade e accesibilidade que se repiten en rúas pechadas, con promesas de accesos peonís a través da estación de tren que nunca se levan a cabo; idéntica mala conectividade coas Brañas do Sar, unha fallida ruta de sendeirismo; alumeado público deficiente en varios puntos do barrio; limpeza das beirarrúas igualmente inaxeitada e deficitaria; problemas de seguridade viaria en Clara Campoamor, Amor Ruibal e Camilo Otero; actuar na rúa Xoan Nogueira conforme aos resultados do referendo veciñal que tivo lugar hai máis de un ano; mala xestión do espazo coñecido como a Lagoa; escombreiras improvisadas como na rúa Boqueixón; problemas de contaminación do rio Sar por unha mala praxe depurativa; situacións de feísmo e de seguridade coas casas abandonadas presentes no barrio.

viernes, 23 de enero de 2015

Iniciativas Urbana Norte e igrexa da Pastoriza



ESQUERDA UNIDA COMPOSTELA REXISTRA, A TRAVÉS DE AGE, DÚAS INICIATIVAS NO PARLAMENTO DE GALICIA INTERESÁNDOSE POLOS INVESTIMENTOS A CARGO DO PROXECTO “SANTIAGO NORTE”, DENTRO DO PROGRAMA INICIATIVA URBANA, FINANCIADO CON FONDOS EUROPEOS.

O CONSELLO COMARCAL DE EU COMPOSTELA AGARDARÁ Á DEFENSA DAS INICIATIVAS PARA RECLAMAR QUE SE REALICEN AS OBRAS PROMETIDAS NO BARRIO DA ALMÁCIGA E BASQUIÑOS

O Consello Comarcal de Esquerda Unida Compostela, trala xuntanza mantida coa AV Francisco Asorey da Almáciga, rexistrou no Parlamento de Galicia, a través de AGE, dúas iniciativas interesándose polos investimentos a cargo do Proxecto “Santiago Norte”, incorporado no Programa Iniciativa Urbana.

Atendendo precisamente a unha demanda de membros da Xunta Directiva da Asociación Veciñal, AGE presenta unha Proposición Non de Lei para coñecer de forma expresa o detalle dos procedementos de auditoría externa previstos nos mecanismos de xestión e control das obras previstos na Memoria do Proxecto “Santiago Norte, e a elaboración dunha memoria exahustiva dos investimentos que se realizaron no barrio da Almáciga, sinalando especialmente o seu  estado de execución, o seu mantemento e o custo real dos investimentos.

Non pode ser que un Proxecto que nacera para loitar contra a “carencia e baixa calidade da urbanización” dos barrios afectados, contribúa, precisamente, a manter ditos parámetros de carencia e baixa calidade. Desinformación, obras mal planificadas e mal xestionadas, sen participación real da veciñanza, o estado actual das obras 6 anos despois da posta en marcha do Proxecto, é o dunha promesa incumprida: son moitos os proxectos comprometidos que ou non se fixeron ou ben están incompletos ou mostran deficiencias. Por exemplo, o parque da Almáciga ofrece un aspecto lamentable e os accesos ofrecen unha elevada perigosidade para as persoas usuarias, incluso hai zonas sen iluminación. Tamén o edificio da Casa depósito considerado ben de interese patrimonial, non é a casa-museo que se cita na Memoria do Proxecto, ou  non se construíu o Centro Cívico Integrado. E poderíamos seguir.

jueves, 22 de enero de 2015

Moción en defensa das persoas afectadas pola Hepatite C



O Consello Comarcal de Esquerda Unida Compostela manifesta o seu apoio á loita das persoas afectadas pola infección do virus da Hepatite C.

Levan meses esixindo ao Goberno o financiamento dun fármaco de recente comercialización (Sofosbuvir), extraordinariamente eficaz na erradicación desta enfermidade. A multinacional que o comercializa, Gilead, impón un prezo abusivo por cada uno dos tratamentos. O Ministerio de Sanidade non está financiando este tratamento e desde a aprobación do mesmo por parte da Axencia Europea de Medicamentos rexistráronse uns 4.000 falecementos de pacientes que poderían terse beneficiado do seu uso.

Denunciamos que o Goberno non actúa debidamente para garantir este tratamento. Aduce problemas de financiamento, debido ao elevado custe do tratamento individual, pero non fai uso das ferramentas que ten o seu alcance, e que poden permitir abaratar o prezo do medicamento e garantir o dereito á asistencia sanitaria e á vida destas persoas.

martes, 20 de enero de 2015

Xuntanza coa AVV do Castiñeiriño



REPRESENTANTES DE ESQUERDA UNIDA COMPOSTELA REÚNENSE COA A.VV. O CASTIÑEIRO DO CASTIÑEIRIÑO PARA A ELABORACIÓN COLECTIVA DO PROGRAMA ELECTORAL DAS MUNICIPAIS

O CONSELLO COMARCAL DE EU COMPOSTELA DENUNCIA REITERA A NECESIDADE, MEDIANTE A DEMOCRACIA PARTICIPATIVA, DE QUE AS VECIÑAS E VECIÑOS POIDAN COLABORAR PARA SOLUCIONAR OS PROBLEMAS DA SÚA RÚA, DO SEU BARRIO, DA CIDADE

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AVV do Castiñeiriño, dentro do programa de visitas ao tecido asociativo da cidade para coñecer de primeira man as necesidades do barrio e facelo partícipe no proceso de elaboración colectiva do programa das municipais de maio do 2015 .

Unha vez máis comprobamos que o goberno local do PP, do dedocrático alcalde Agustín Hernández, non escoita as veciñas e veciños, non fai partícipe ao barrio na toma de decisións. Desde que chegou ao goberno local, o Alcalde adoptou unha actitude de desleixo para cos barrios e parroquias tradicionais da cidade.

As veciñas e veciños deben ser partícipes do día a día da cidade, na toma das decisións que máis lle afectan no día a día. E, tal como acontecía coa AV Escultor Francisco Asorei, a AV do Castiñeiriño amosou a súa preocupación pola actual política dun Alcalde decidido a levantar toda a cidade e sitiala de obras, con tal de vencer a memoria da veciñanza sobre os 3 primeiros anos de corrupción e parálise. Mais a veciñanza non é tan desmemoriada como quere o Alcalde, e o DOG e co BOE non poden silenciar tantos anos de deriva e naufraxio da democracia.

jueves, 15 de enero de 2015

Crítica á xestión do PP en Carreira do Conde



ESQUERDA UNIDA COMPOSTELA REITERA, UNHA VEZ MÁIS, QUE A DEMOCRACIA PARTICIPATIVA TEN QUE SER UNHA REALIDADE PARA FACER PARTÍCIPE AS VECIÑAS E VECIÑOS DAS ACTUACIÓNS QUE ACOMETE O CONCELLO

O CONSELLO COMARCAL DE EU COMPOSTELA DENUNCIA A NEFASTA XESTIÓN DO PARTIDO POPULAR NAS OBRAS DE CARREIRA DO CONDE.

Para o Consello Comarcal de Esquerda Unida Compostela a incompetencia mostrada polo goberno local do Partido Popular nas obras de Carreira do Conde, demostra, unha vez máis, a execrable xestión do dedocrático alcalde Agustín Hernández, que tanto dano fai a Santiago.

En primeiro lugar, é inadmisible, como xa ten ocorrido en outros moitos barrios da cidade, a falta de información coa que actúa o PP nas medidas que toma. As veciñas e veciños teñen o dereito a que o Concello, como mínimo, avise en tempo e forma, por exemplo, das obras que se van acometer no seu barrio.

Por suposto, para Esquerda Unida é necesario ir moito máis aló, e facer real a Democracia Participativa, coa que conseguir, non so que a xente teña a información que demanda, se non que sexa partícipe das medidas que se acometan, colaborando activamente para achar as mellores solucións ante as eivas que poidan existir na súa rúa, no seu barrio, na cidade.

miércoles, 14 de enero de 2015

Xuntanza coa AVV Francisco Asorey da Almáciga



ESQUERDA UNIDA COMPOSTELA REÚNESE COA A.VV. FRANCISCO ASOREY DA ALMÁCIGA PARA A ELABORACIÓN COLECTIVA DO PROGRAMA ELECTORAL DAS MUNICIPAIS

O CONSELLO COMARCAL DE EU COMPOSTELA DENUNCIA QUE O GOBERNO LOCAL DO PP COVIRTE A ALMÁCIGA NUN BARRIO DE OBRAS ABANDONADAS OU ESQUECIDAS

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AVV Francisco Asorey da Almáciga, dentro do programa de visitas ao tecido asociativo da cidade para coñecer de primeira man as necesidades do barrio e facelo partícipe no proceso de elaboración colectiva do programa das municipais de maio do 2015 .

A xestión do equipo de goberno de local do PP neste barrio é nefasta e totalmente lesiva para cos intereses da veciñanza. É inaceptable que, sen informar debidamente á veciñanza, se paren as obras de acondicionamento do Parque da Almáciga. O parque, agora mesmo, ofrece un estado lamentable que, de non realizarse as obras precisas, empeorará e farán inútil o traballo realizado ate o de agora. Xa leva dous meses sen iluminación. E o Alcalde, en vez de asumir o goberno, dilles aos veciños e veciñas que falen coa empresa que realiza as obras.

Os accesos do Parque son perigosísimos para a saúde das persoas. Nun só día de choiva o parque converteuse nunha lodeira que correu cara abaixo por non existir ningunha obra axeitada de canalización de augas. As árbores non se podan desde hai anos: algunha delas déitase enriba do tellado do local da asociación veciñal.

miércoles, 7 de enero de 2015

Moción contra o TTIP



O Consello Comarcal de Esquerda Unida Compostela únese á denuncia de que a Unión Europea (UE) e os Estados Unidos de América (EUA) están a negociar, de costas á cidadanía e aos seus representantes políticos (parlamentos nacionais e europeo), un amplo acordo de liberalización de comercio e investimentos, que representa un serio perigo para a democracia e a debida protección dos dereitos laborais, ambientais e de saúde, antepoñendo o interese comercial dos investidores e empresas transnacionais (ETN) ao interese xeral.

O TTIP, ao perseguir a liberalización total dos servizos públicos e a apertura de prestación destes ás ETN, así como ás compras e licitacións de bens e servizos das Administracións Públicas, pon en perigo todos os servizos públicos e as compras públicas, en todos os niveis de poder, e compromete a habilidade dos representantes elixidos para administrar libremente as súas comunidades locais e promover a industria, emprego e iniciativas locais.

Deste modo, as leis do comercio priman sobre calquera outra consideración social, e ignoran calquera lexislación continental, estatal, autonómica ou local. As comunidades locais encóntranse elas mesmas dominadas por axustes estruturais restritivos debidos aos acordos e as políticas de libre comercio e de protección do investidor. Esta lóxica desmantela os servizos públicos e suprime a liberdade dos poderes locais para subministrar os servizos públicos e satisfacer as necesidades sociais das súas poboacións, atendendo a políticas e plans de desenvolvemento industrial e de fomento da industria e emprego locais.