Moción subvencionar IBI a persoas en risco de exclusión social

O grupo de traballo de políticas sociais de Esquerda Unida Compostela considera que calquera Administración Pública ten que ter, entre un dos seus obxectivos principais, garantir o dereito a unha vivenda digna.

Consideramos que para que o acceso a unha vivenda digna sexa unha realidade para a maioría social é necesario destronar o actual modelo, que busca o lucro privado, tal e como se pode comprobar co pelotazo urbanístico que o PP defende coa operación especulativa de Xoán XXIII.

Dende o grupo de  traballo de políticas sociais de EU Compostela, para acabar con este modelo antisocial, que ten á vivenda como un negocio e non como un dereito, apoiamos, entre outras moitas medidas, a creación dunha axencia pública municipal de aluguer social, presentada en marzo de 2012. Tamén consideramos necesaria a creación dun Servizo Municipal de Atención Integral a Persoas sen Fogar, como propuxemos en outubro de 2013.

Valoración orzamento municipal

O CONSELLO COMARCAL  DE ESQUERDA UNIDA COMPOSTELA CONSIDERA OS ORZAMENTOS DO PP PARA SANTIAGO COMO INVIABLES E MERAMENTE ELECTORALISTAS.

O CONSELLO COMARCAL DE EU COMPOSTELA DENUNCIA QUE OS ORZAMENTOS DE AGUSTÍN HERNÁNDEZ PRIORIZAN OS GASTOS SUPERFLUOS EN LUGAR DO BENESTAR DAS VECIÑAS E VECIÑOS.

O Consello Comarcal de Esquerda Unida Compostela considera que os orzamentos presentados polo Concello de Santiago de Compostela para o ano 2015 son de imposible viabilidade e as súas prioridades, un ano máis, son as grandes obras e os gastos superfluos en vez do benestar da veciñanza e paliar as inxustizas sociais da nosa cidade.

O Partido Popular preséntanos uns orzamentos con dubidosas prioridades. Partidas de obras non necesarias con contías elevadas fronte ás partidas de acción de social, de promoción do emprego ou de vivenda. O PP compostelán comezou con este orzamento a súa  campaña electoral para as vindeiras eleccións municipais. Promesas de grandes gastos vistosos para a foto de inauguración, mais esquecendo o futuro, o custo de mantemento.

Este goberno municipal non fixo os deberes como alardea o alcalde, os orzamentos son irreais, inflados, inviables, establecen gastos en investimentos sen ter garantida a súa contrapartida en ingresos, dependendo esta da venda de terreos propiedade do Concello. E para Esquerda Unida non se pode facer negocio co patrimonio público do solo. O Partido Popular presume da rebaixa do IBI urbano en 0.03, parece esquecer que só fai 2 anos a veciñanza de Compostela sufrimos un incremento neste imposto de case o 14 %. As contas demostran a precaria situación do noso Concello, froito da pésima xestión de anos, endebedado, tendo que empregar o remanente do ano 2014, máis de 5 millóns de euros,  ao pago da débeda.

Oposición á especulación urbanística en Xoán XXIII

O CONSELLO COMARCAL  DE ESQUERDA UNIDA COMPOSTELA OPONSE Á ESPECULACIÓN URBANÍSTICA QUE O PP QUERE LEVAR A CABO EN XOÁN XXIII, E ESIXE QUE ACOMETA, O ANTES POSIBLE, O PROXECTO PLANIFICADO DE PISOS PROTEXIDOS EN RÉXIME DE ALUGUER PARA A MOCIDADE CON RENDAS BAIXAS.

O CONSELLO COMARCAL DE EU COMPOSTELA REITERA A NECESIDADE DE MUDAR ESTE SISTEMA ESPECULATIVO E DELEZNABLE, QUE CONVIRTE O DEREITO Á VIVENDA NUN PRIVILEXIO, PROPOÑENDO MEDIDAS QUE, ENTRE OUTRAS CUESTIÓNS, FOMENTEN O ALUGUER SOCIAL.

O Consello Comarcal de Esquerda Unida Compostela manifesta que unha das labores fundamentais de calquera Administración Pública é a de velar por garantir un dos dereitos máis fundamental e básico  das veciñas e veciños. O dereito a unha vivenda digna.

Teméndonos o peor, ou intuíndo que a lóxica especuladora e neoliberal do Partido Popular aparecería, en marzo de 2012 presentamos unha pregunta ao Concello requirindo saber cales eran as intencións do goberno local respecto ao proxecto de vivendas públicas en aluguer en Xoán XXIII. Hoxe temos resposta. Unha nova resposta do PP que vela polo lucro privado e non polo beneficio da maioría social.

O Consello Comarcal de EU Compostela manifesta o seu máis profundo rexeitamento a que o Partido Popular, tanto na Xunta como no Concello, abandone o proxecto inicial de Xoán XXIII para entregalo á especulación inmobiliaria. Permitindo que nesa zona “privilexiada” da cidade sexa vivenda libre, é dicir cara e para unha minoría que a poda pagar, a que se erga en lugar dos pisos protexidos que prestarían o servizo público e social que a cidadanía demanda.

Manifesto polo 25N: A loita contra a violencia machista, segue a ser a loita pola igualdade entre Mulleres e Homes

Para a Área de Mulleres de Esquerda Unida Compostela a valoración do tráxico balance ao longo deste ano, marcado polo alarmante aumento, de agresións sexuais, vexacións verbais e asasinatos de mulleres en todo o Estado, e a nula reacción dos poderes públicos, corroboran que as relacións entre homes e mulleres seguen a construírse sobre bases patriarcais que apuntalan a desigualdade e a discriminación  machista.

Neste contexto de desigualdade e discriminación patriarcal onde se enmarcan todo tipo de agresións contra as mulleres. Só unha sociedade fundamentada e asentada na igualdade real, impediría que a crise económica puidera servir de pretexto ou explicación.

Para a Área de Mulleres de EU Compostela o feito de que a mesma imaxe do corpo da muller como simple obxecto  que se proxectan moitos medios de comunicación e de publicidade, e inclusive dende espazos sociais e políticos con declaracións e comportamentos atentatorios e denigrantes ás mulleres, mandan unhas mensaxes sexistas de gran calado, que en gran medida promoven e suscitan implicitamente a violencia machista e a desigualdade.

Moción polo 25N

“A LOITA CONTRA A VIOLENCIA MACHISTA, SEGUE A SER A LOITA POLA IGUALDADE ENTRE MULLERES E HOMES.”

Para a Área de Mulleres de Esquerda Unida Compostela a valoración do tráxico balance ao longo deste ano, marcado polo alarmante aumento, de agresións sexuais, vexacións verbais e asasinatos de mulleres en todo o Estado, e a nula reacción dos poderes públicos, corroboran que as relacións entre homes e mulleres seguen a construírse sobre bases patriarcais que apuntalan a desigualdade e a discriminación  machista.

Neste contexto de desigualdade e discriminación patriarcal onde se enmarcan todo tipo de agresións contra as mulleres. Só unha sociedade fundamentada e asentada na igualdade real, impediría que a crise económica puidera servir de pretexto ou explicación.

O feito de que a mesma imaxe do corpo da muller como simple obxecto  que se proxectan moitos medios de comunicación e de publicidade, e inclusive dende espazos sociais e políticos con declaracións e comportamentos atentatorios e denigrantes ás mulleres, mandan unhas mensaxes sexistas de gran calado, que en gran medida promoven e suscitan implicitamente a violencia machista e a desigualdade.

Carta de Xabier Ron animando a participar no Encontro programático

Prezada veciña / prezado veciño

Desde a nosa tradición de esquerda, transformadora e anticapitalista, levamos moito tempo en ESQUERDA UNIDA traballando desde o convencemento de que existe unha alternativa ao sistema capitalista, hoxe transformado nun verdadeiro monstro cobizoso baixo a súa faciana neoliberal.

Xa hai un lustro que nos dimos conta de que sós non se vai a ningures. Que o rival é demasiado poderoso como para que pequenos átomos acudan a loitar contra ese xigantesco Goliat. Así naceu o proceso da Refundación da Esquerda en Esquerda Unida que fraguou no 2012 na conformación da coalición Alternativa Galega de Esquerda, con representación no Parlamento de Galicia. 

Mais as urxencias son demasiadas. Son moitas as frontes. Ningún eido queda liberado das gadoupas dos recortes, deste austericidio que empurra á pobreza a cada vez máis persoas. Un sistema de vida que nos quere submisos e resignados.

Elección democrática de alcaldes e alcaldesas

Para o Consello Comarcal de Esquerda Unida Compostela o ámbito local é un espazo complexo e plural, a primeira instancia para a resolución dos problemas da cidadanía e para a mellora das condicións de vida da xente.

Os Concellos son o principal dique de contención contra a crise, una espazo de resistencia, de dignidade, de defensa dos dereitos da cidadanía, onde se xeran alternativas sociais e económicas para paliar os efectos da crise e dos recortes.

O Consello Comarcal de EU defendemos un modelo de goberno local de proximidade, un modelo que desenrole a autonomía local e as competencias, con recursos suficientes para facelas efectivas.

Defensa música na rúa

O CONSELLO COMARCAL DE EU COMPOSTELA PIDE EXPLICACIÓNS AO CONCELLO POLA PROHIBICIÓN DE TOCAR NO ARCO DA PRAZA DO OBRADOIRO AOS MÚSICOS DA RÚA

O CONSELLO COMARCAL DE EU DEMANDA AO CONCELLO QUE DEA MARCHA ATRÁS AO ESTAR PERXUDICANDO O TRABALLO DOS MÚSICOS E UN DOS ATRACTIVOS TURÍSTICOS DA PRAZA

Dende o Consello Comarcal de Esquerda Unida Compostela sempre defendemos e defenderemos todo tipo de expresión cultural que enriqueza as rúas da cidade, o que ao mesmo tempo é un creador de beleza para os e as habitantes da capital galega.

Recentemente, unha destas actividades, cunha longa tradición ademais, vén de ser eliminada por unha nova normativa do Concello que impide a realización de concertos no arco da Praza do Obradoiro, eliminando así o sustento dunha importante cantidade dos músicos da rúa de Compostela.

Moción apoio ao pobo palestino

O Consello Comarcal de Esquerda Unida Compostela reitera, unha vez máis, o seu apoio ao pobo palestino.

Co pretexto do secuestro e do asasinato non aclarado de tres novos estudantes israelís das colonias en Cisxordania ocorridos o 12 de xuño, o goberno Israelí lanzou unha vez máis outra das súas operacións de castigo sobre a poboación palestina encerrada na Franxa de Gaza. Mentres o goberno israelí incitou ás represalias, os lemas racistas e ataques contra a poboación palestina estendéronse nos medios e nas rúas de Israel, o que resultou no asasinato dun adolescente palestino que foi queimado vivo en Xerusalén por uns israelís ultras o pasado 1 de xullo.

O martes 7 de xullo, Netanyahu iniciou unha operación militar de gran envergadura contra a Franxa de Gaza, satisfacendo así as esixencias do seu Ministro de Exteriores.

Fóra Currás do Concello

O CONSELLO COMARCAL DE ESQUERDA UNIDA COMPOSTELA ESIXE AO ALCALDE DEDOCRÁTICO HERNÁNDEZ QUE RECITIFIQUE E QUE RETIRE O PRIVILEXIO CONCEDIDO A CURRÁS

Para o Consello Comarcal de Esquerda Unida Compostela o goberno dedocrático de Hernández ampara co diñeiro de toda a cidadanía compostelá, o labor escuro e destrutivo de Currás á fronte da Corporación Municipal, recompensándoo cunha dedicación exclusiva.

O novo alcalde de Compostela, non elixido polo pobo para dita tarefa, tal como intuía este consello comarcal, segue escribindo con entusiasmo as páxinas máis escuras da nosa democracia, desde que morreu o Ditador Franco.

No cumio da indecencia democrática, o terceiro alcalde, Hernández, premia ao segundo alcalde, Currás, pola súa excelente xestión de goberno, a cal, para quen non recorde, consistiu en destruír a confianza da cidadanía nos seus representantes políticos e cargos públicos,  por amparar o reino fedorento da corrupción, sendo el mesmo dobremente imputado, pola súa declarada e manifesta incompetencia política que provocou a parálise efectiva do goberno da nosa cidade.

Moción defensa e fortalecemento educación pública

Dende O Consello Comarcal de Esquerda Unida Compostela loitamos de forma decidida por unha educación pública, de calidade, laica e gratuíta para a cidade.

Por iso defendemos un plan integral de actuación para acadar a mellor educación pública posible na cidade. É necesario contar coa participación cidadá, xa sexa de organizacións ou asociacións, como por exemplo as ANPAS, ou incluso a título persoal, pois o reto de acadar a mellor educación pública posible é colectivo, é un reto de todas as veciñas e veciños.

Non podemos permitir que siga existindo, porque os xestores políticos que hai así o quixeron, un Consello Municipal de Ensino que non cumpre coa función encomendada. Hai que constituír, para desenvolver de forma participativa a educación que beneficie a maioría social, as ferramentas necesarias (Asemblea de Barrio; Consello de Barrio; Asemblea Sectorial de Educación; Consello Sectorial de Educación; Consello do Concello).

NON á reincorporación de Domingo Neira á docencia na USC

O CONSELLO COMARCAL DE ESQUERDA UNIDA COMPOSTELA E ALEAS-EU OPÓÑENSE A QUE DOMINGO NEIRA GARCÍA SE REINTEGRA Á DOCENCIA NA USC

O CONSELLO COMARCAL DE EU COMPOSTELA E ALEAS-EU DEMANDAN QUE DENDE AS DISTINTAS INSTITUCIÓNS PÚBLICAS SE DEBE DAR EXEMPLO NA LOITA CONTRA A HOMOFOBIA.

O Consello Comarcal de EU Compostela e ALEAS-EU manifestamos a nosa total repulsa e condena á homofobia aínda hoxe existente na sociedade, e reiteramos o noso compromiso na loita contra a erradicación desta lacra que atenta contra os dereitos do colectivo LGTBI

No día de hoxe, fíxose público que o profesor Domingo Neira García, o docente homófobo e misóxino de Maxisterio Infantil ao cal se lle abrira un expediente polas súas leccións de odio, reintégrase á docencia na USC, logo de cumprir unha sanción disciplinaria (suspensión da posibilidade de impartir clases e retirada de soldo, durante dous meses) como consecuencia das denuncias do alumnado contra esta persoa.

Non se pode permitir que a USC reincorpore a Domingo Neira na docencia, e máis aínda despois de que o mesmo órgano directivo da universidade emitise un comunicado o pasado día 28 de xuño – Día Internacional do Orgullo LGTBI – declarando e manifestando o seu compromiso coa comunidade LGTBI e que traballará a favor da igualdade entre persoas con independencia da súa orientación sexual.

Defensa emprego estable e de calidade

O Consello Comarcal de Esquerda Unida Compostela defendeu, defende e defenderá que o Concello sexa parte activa na loita por acadar a consecución de emprego estable e de calidade, que non é un privilexio, se non un dereito de todas as veciñas e veciños.

Por suposto sabemos que a Administración Local ten certas limitacións para actuar de maneira potente nas políticas de emprego, sendo outras administracións a que teñen moitísima maior capacidade de incidencia neste eido.

Dito isto, a deficiente atribución de competencias ao Concello, non pode ser escusa baixo a que amparar a imcompetencia que leva demostrado o PP no goberno local. A Administración Local pode actuar tanto activamente, como tamén concienciando, esixindo ou denunciando o que sexa necesario para acadar o dereito a un emprego estable e de calidade para a cidadanía.

Defensa e fortalecemento dos Servizos Sociais

Para o Consello Comarcal de Esquerda Unida Compostela, como se demostra nas distintas propostas elevadas ao Pleno do Concello, os servizos sociais son un dereito fundamental das veciñas e veciños.

Por suposto todas as Administracións Públicas teñen que velar por garantir servizos sociais públicos que busquen o beneficio da maioría social. Pero o Concello, ao ser a administración máis próxima á cidadanía, ten a posibilidade dun contacto directo para coñecer a realidade, e de maneira directa, ou elevando-esixindo a Administración Pública competente, cumprir coa súa obriga para que na cidade existan solucións ás demandas das veciñas e veciños. 

Unha vez máis queremos remarcar que os servizos socias non son un servizo asistencialista de carácter caritativo, son un piar esencial para desenvolver as políticas de igualdade de oportunidades entre as persoas.

Moción Día Orgullo LGTBI

En poucos días chega o 28 de Xuño, día internacional do Orgullo LGBTI, unha data que simboliza o valor, o esforzo e o sufrimento de moitas persoas que ao longo da historia e na actualidade loitaron e seguen loitando polo recoñecemento dos seus dereitos e liberdades.

Sen dúbida falamos dun día importante para a comunidade LGTBI, xa que moitas persoas gozamos hoxe de logros sociais en materia de igualdade froito das loitas do pasado. Grazas ao activismo LGTBI, estamos comezando a vivir en sociedades cada vez máis saudábeis nas que os ríxidos moldes culturais heteronormativos pouco a pouco vanse crebando.

A memoria colectiva é aquilo que evita que as sociedades repitan erros xa superados. Por iso, nin as institucións nin a sociedade debemos esquecer a nosa historia machista e manchada de LGTBIfobia. E polo mesmo motivo, as institucións deben recoñecer os erros que se cometen aínda: falamos do enorme retroceso ao que se está sometendo á cidadanía do Estado Español coas políticas austericidas e heteropatriarcais que viñeron aprobándose nos anteriores gobernos centrais e autonómicos e que afectan especialmente a esta comunidade. Políticas que poñen en grave perigo os logros sociais conseguidos e que nos retrotraen ao pasado en canto a dereitos e liberdades que dabamos por adquiridos.

Apertura comedores escolares no verán

O pasado dia 11 de Xuño, o Parlamento de Galicia aprobou por unanimidade unha Proposición non de Lei na que se resolve que "O Parlamento de Galicia insta á Xunta de Galicia a levar a cabo as medidas necesarias para evitar que ningún neno ou nena careza de alimentación ou sustento necesario por estar en situación de vulnerabilidade, poñéndose en marcha convenios cos concellos interesados, podéndose usar as instalacións dos centros educativos en colaboración cos servizos públicos de benestar" .

O curso escolar, nos seus niveis obrigatorios, remata o dia 20 de xuño e moitas familias galegas non saben como poder garantir unha axeitada alimentación para os seus fillos e fillas nos dous meses non lectivos, diante da grave situación socioeconómica pola que están a atravesar.

Segundo os datos oficiais, en Galicia hai 93.000 familias con todos os seus membros en paro, o 23% da poboación atópase en situación de pobreza, 33.000 familias sobreviven sen ningún tipo de ingreso e un 26% dos fogares con menores a cargo están en risco de exclusión social.

Situación Concello

O CONSELLO COMARCAL  DE ESQUERDA UNIDA COMPOSTELA ESIXE QUE ÁNGEL CÚRRAS ABANDONE INMEDIATAMENTE O SEU CARGO DE CONCELLEIRO.

O CONSELLO COMARCAL DE EU COMPOSTELA CULPA AO INCOMPETENTE NÚÑEZ FEIJOO DO QUE ACONTECE NA CIDADE.

O Consello Comarcal de EU Compostela, tras agardar a ver cal era a “solución” do Partido Popular para o Concello, considera que o futuro equipo de (des)goberno local é un insulto á cidadanía, carece de toda lexitimidade e rouba as veciñas e veciños o dereito a decidir democraticamente o futuro que desexa para a cidade

En primeiro lugar é inadmisible que o individuo Ángel Currás siga mancillando coa súa presenza a Administración Local, inmediatamente ten que deixar de ser concelleiro. Se a súa carencia da máis mínima decencia o aferra ao cargo que ostenta, o Partido Popular debe tomar medidas. Se non consigue que abandone o Concello debe expulsalo do grupo municipal do PP e desterralo ao grupo mixto. Pode ser que para o Partido Popular sexa lóxico que unha persoa dimita de alcalde e siga de concelleiro, ou que, como Paula Prado, dimita de voceira pero siga de deputada, pero para a maioría social, que si ten principios, é un comportamento deleznable e egocéntrico.

Referéndum República-monarquía

O Consello Comarcal de Esquerda Unida Compostela considera que a extraordinaria importancia dos feitos acaecidos durante estas semanas, que culminou co anuncio da abdicación do Rei, mostra a necesidade cada vez máis perentoria de propiciar un cambio profundo que favoreza a rexeneración política do Estado español. É por tanto a abdicación unha consecuencia directa da deterioración profunda da Coroa e da decadencia do bipartidismo que foi o soporte do sistema monárquico.

O artigo 57.5 da Constitución española establece que as abdicacións teñen que regularse mediante lei orgánica. Con todo, tal lei aínda non se promulgou e, con todo, o actual monarca xa manifestou, a través do Presidente do Goberno, a súa decisión de abdicar en favor do seu fillo.

Moción polo Día contra a LGTBIfobia

O 17 de maio celébrase o Día Internacional contra a LGTBIfobia, é dicir, un día de loita contra a discriminación por motivos de orientación sexual e identidade de xénero. Por desgraza a LGTBIfobia persiste na nosa sociedade, mostrándose con moitas e diversas caras. A discriminación exercida contra lesbianas, gais, transexuais, bisexuais e intersexuais é violencia e como tal debe ser denunciada e condenada enérxicamente tanto pola sociedade, como polos propios poderes públicos.

O Estado Español ofrece unha realidade paradoxal a aquelas persoas que coas súas vidas desbordan a “normalidade” acerca da vivencia do xénero ou a orientación sexual. O Estado Español, por unha banda, é considerado un dos países máis avanzados en igualdade real da UE, neste sentido, é certo que demos algúns pasos en positivo. Pero, doutra banda, queda moito traballo por facer:

Non queremos ser un país preocupado únicamente por liderar rankings económicos, pero no que á súa vez se sigan suicidando vítimas de bullying LGTBIfóbico; no que a medicina sígase guiando por convencións como o Diagnostic and Statistical Manual of Mental Disorders (DSM) e a Clasificación Internacional de Enfermidades (CIE) que aínda patoloxizan a transexualidad como disforia de xénero; no que ás lesbianas e ás bisexuais prívellas do seu dereito a acceder a tratamentos públicos de reprodución asistida, continúellas invisibilizando nos protocolos xinecolóxicos e na sociedade debido ao sistema heteropatriarcal que nos oprime; no que persista un exercicio impune da violencia nas rúas, nas aulas e nos centros de emprego por motivos de orientación sexual ou vivencia do xénero non normativo.

Comercio Xusto

O CONSELLO COMARCAL  DE ESQUERDA UNIDA COMPOSTELA REITERA O SEU COMPROMISO EN DEFENSA DA COMERCIO XUSTO.

O CONSELLO COMARCAL DE EU COMPOSTELA DEMANDA QUE O CONCELLO PROMOVA ALTERNATIVA E SE COMPROMETA A CONSUMIR RESPONSABLEMETNE

Para o Consello Comarcal de Esquerda Unida Compostela é necesario que o Concello se involucre na defensa e promoción do Comercio Xusto

O Día Mundial do Comercio Xusto, que se celebra en máis de 50 países, e en España en máis de 60 localidades, é un día para reivindicar políticas comerciais máis xustas e alternativas de consumo e produción que respecten os dereitos das persoas e do medio ambiente. Existen alternativas ao sistema capitalista imperante abusivo e especulativo en todas as cidades galegas que as administracións públicas e os nosos gobernos deberían apoiar e difundir.

É a obriga dous nosos gobernos , sobre todos dous que temos máis preto, como é o caso do Concello de Santiago , apoiar e difundir iniciativas vinculadas a economía solidaria para promover a xustiza social e a solidariedade dos galegos e galegas con outros pobos do mundo e dos propios galegos e gales entre si. A banca ética, as cooperativas de consumo e produción, as tendas de comercio xusto,... son alternativas reais de consumo e produción que existen na nosa cidade e deben ser apoiadas dende as administracións locais.

Pregunta garantir dereito á vivenda e alimentación

O Consello Comarcal de Esquerda Unida Compostela defende que o Concello, e calquera Administración Pública, leve a cabo, dende a titularidade e xestión pública, os servizos necesarios para garantir o benestar da cidadanía.

Por suposto o Concello, como calquera Administración Pública, ten a obriga de colaborar no que sexa posible e necesario coa sociedade, que organizada en asociacións, ONGs ou o a forma xurídica que considere oportuna, tamén traballa en asuntos sociais co fin de garantir a xustiza e igualdade.

Por exemplo é obvio que o Albergue Xoán XXIII, como contrastamos tras reunirnos con eles, fan unha labor, por desgraza, moi necesaria, e por suposto o Concello debe colaborar con esta institución. Pero a administración local ten a obriga de prestar o servizo, de titularidade e xestión pública, que cubra a demanda das veciñas e veciños sen vivenda na que vivir. Por iso propuxeramos que se creara a o Servizo Municipal de Atención Integral a Persoas sen Fogar.

Apoio concentración no INEM

O CONSELLO COMARCAL DE EU COMPOSTELA APOIA A MOBILIZACIÓN DAS MARCHAS DA DIGNIDADE DESTE MÉRCORES ÁS 12:30H DIANTE DA OFICINA DO INEM DA RÚA RAMÓN PIÑEIRO

PARA O CONSELLO COMARCAL DE ESQUERDA UNIDA OS ÚLTIMOS DATOS DO DESEMPREGO DEMOSTRAN QUE A MOBILIZACIÓN É HOXE MÁIS NECESARIA QUE NUNCA

O Consello Comarcal de Esquerda Unida Compostela sempre defenderá e loitará por garantir os dereitos da clase traballadora.

O pasado 22 de marzo demostrouse que só o pobo defende ao pobo e que a situación que está a vivir a poboación é insostible. Nesa mobilización, exemplo de unidade de loita e cunha gran participación galega na mesma, berrouse que seguiamos indignadas e indignados e que esiximos un cambo de rumbo radical deste mundo, esiximos a caída deste réxime corrupto e represor.

As Marchas da Dignidade nunca foron pensadas coma algo momentáneo, senón que sempre se organizaron como un movemento de longa duración, algo que xa é unha realidade. Como demostra a Asemblea Nacional da Marcha da Dignidade Galega o pasado 26 de abril en Oza, no que se decidiron as seguintes accións a levar a cabo.

Visibilidade lésbica

Dende o ano 2008, o movemento LGTBI reivindica o día 26 de Abril como o día da Visibilidade Lésbica. Este día xurdiu pola necesidade social de que a realidade das lesbianas se fixera presente con forza na sociedade e poder así romper cos prexuízos, o descoñecemento e a invisibilidade que sufría este colectivo.

Os avances logrados nestes últimos anos grazas á loita de toda a comunidade LGTBI son moitos, logros que posibilitaron que se equiparen legalmente co resto da cidadanía. Sen embargo, a igualdade social real aínda está por conquistar.

Dentro o colectivo LGTBI, as lesbianas continúan vivindo unha invisibilidade social, froito da dobre discriminación que sofren: Por un lado son mulleres, e como tales nun sistema patriarcal e misóxino quedan relegadas a un segundo plano, a un ámbito privado mentres que o masculino ocupa espacios públicos e relevantes. E por outro lado, porque como lesbianas seguen uns cánones sexuais non establecidos como “normais”, vivindo a súa sexualidade ao marxe dos homes, fóra das fronteiras do sistema patriarcal. Para eliminar esta discriminación, froito da lesbofobia e do machismo do sistema, é necesario seguir traballando na consecución da igualdade real, nas rúas e nas institucións.

"Republicanizar" o futuro, escrito de Sofía Díaz polo 14 de Abril

"REPUBLICANIZAR" O FUTURO.

Hoxe é un bo día para que fagamos un chamamento á sociedade en xeral, todas as persoas que, desde posicións de movilización e de rexeneración democrática, vemos a necesidade dunha ruptura co modelo saído da transición e apostamos por unha sociedade nova, que supoña o fin deste réxime caduco, por  monárquico, bipartidista, neoliberal, heteropatriarcal e corrupto, carente de democracia, esgotado no seu funcionamento e que non quere nin pode dar resposta ás necesidades da cidadanía.

Esa sociedade nova será republicana, federal, laica, participativa, solidaria, feminista, cun claro compoñente social, con respeto e recoñecemento non só da perspectiva de xénero, senón tamén con perspectiva da diversidade social (persoas migrantes, persoas LGTBI,…) respeto e recoñecemento tamén da identidade dos pobos e o seu dereito a decidir.

Nesa República o poder no social será tan importante como o poder no político. A conciencia cívica, a organización social, a presión reivindicativa serán fundamentales no proceso constituinte republicano. Nese sentido, porque todo está conectado, aí estivemos nas Marchas da Dignidade do 22 de marzo, posicionando a República como alternativa de poder social e político.

Verbas de Abuín a Machado

DON ANTONIO

Ai don Antonio, don Antonio,

foi vostede portador de todos os dons que dignifican, de todos:

do don da palabra álxida,

do don de ser feliz co exiguo,

do don do decoro moral,

do don da filantropía...

e a maiores corrían polas súas venas pingas de sangue xacobina, como vostede mesmo dixo á hora de describirse.

E que mal pago lle deu o mundo, don Antonio, co que o mundo lle debía. O mundo non o merecía, don Antonio, o mundo non o merecía. Non, o mundo non o merecía. Pero os descalzos do mundo, todos os descalzos do mundo, si. Porque ben sabemos nós que o nicho que agora ocupa no adusto cemiterio de Collioure é desde a tarde do 22 de febreiro de 1939 un anaco da lexítima patria de todos os descalzos de todos os países. Que o saiba, don Antonio, que o saiba.

Verbas de Xesús Redondo Abuín polo 14 de Abril

¡SEMPRE REPÚBLICA!

A barbarie que o 18 de xullo de 1936 se alzou en armas contra a forza da palabra di agora que o mellor é esquecelo todo. Non recordar. Porque nos dous bandos houbo, din, atrocidades. Certo. Pero esa certeza non é toda a verdade. Falta dicir que o 16 de febreiro de 1936 o Frente Popular gañou coa forza da palabra 52 deputados máis que a suma dos deputados que gañou o Frente de Dereitas. E que o Frente de Dereitas gañou 52 deputados menos que o Frente Popular. E que eles foron os que non acataron o resultado. E que foi desde esa derrota democrática que non acataron desde a que os capataces armados do Frente de Dereitas fixo correr o sangue a cántaros por todos os pobos de España. Esa é a diferenza entre o veraz e o falso. Logo entonces está ben claro: un dos bandos cometeu as atrocidades que cometeu defendendo lexitimamente a legalidade republicana e o outro cometeunas contra toda lexitimidade. E aínda hai outra razón colosal a constatar, esta é, aquí está: desde que o bando vencedor anunciou que o bando vencido estaba cativo e desarmado, desde que proclamaron que a guerra estaba terminada, os envorcados ó exilio foron medio millón, os paseados e os fusilados foron 200.000 e 3.000.000 os comestos pola tuberculose e a friaxe de xulgado en xulgado e de cárcere en cárcere. Son miles os que aínda hoxe non se sabe onde foron debruzados ó nunca máis ¡Gloria a todos aqueles e a todas aquelas que preferiron morrer de pé a vivir unha vida de gando!

Homenaxe de Xabier Ron á República

A RADIO PIRENAICA, A ÚNICA RADIO SEN CENSURA NA ESPAÑA DE FRANCO

Cada 14 de abril a República volve con máis forza. Porque sempre está en nós. Memoria viva dos vencidos e vencidas, dos milleiros de persoas que desapareceron baixo a forza asasina dos golpistas de Franco, dos que loitaron sen repouso para derrotalo.

Hoxe, a nosa homenaxe érguese coa Radio Pirenaica, a única radio sen censura durante a ditadura franquista, que desafiaba a Franco e que, desde a clandestinidade, loitaba pola verdade, pola xustiza, pola democracia.

A Radio Pirenaica foi fundada polo PCE para ser soporte da loita dos e das camaradas contra Franco. Mais convertéuse en voz da loita pola democracia. A Radio Pirenaica era a radio da verdade fronte á Radio da Mentira que era Radio Nacional de España.

Apoio á querela arxentina contra a ditadura franquista

O Consello Comarcal de Esquerda Unida Compostela pide que o Concello de Santiago de Compostela apoie a querela arxentina contra a ditadura franquista.

En xullo de 1936 a sublevación militar encabezada polo xeneral Franco derrocou ao Goberno lexítimo da República, e instaurou un réxime totalitario baseado na persecución e aniquilación física das e dos defensores da liberdade, da xustiza social e dos dereitos das persoas.

Dito réxime ditatorial, foi mantido polo exército, a oligarquía e a Igrexa católica durante os seguintes corenta anos mediante a máis feroz represión de calquera oposición, utilizando para iso medios que poden ser cualificados de xenocidio contra o seu propio pobo.

Xuntanza con Down Compostela

O CONSELLO COMARCAL  DE ESQUERDA UNIDA COMPOSTELA MANTÉN UNHA XUNTANZA COA FUNDACIÓN DOWN COMPOSTELA.

O CONSELLO COMARCAL DE EU COMPOSTELA DEMANDA A ELABORACIÓN DUN PLAN LOCAL PARA A INCLUSIÓN SOCIAL DE PERSOAS CON DISCAPACIDADE.

O coordinador comarcal de Esquerda Unida Compostela, Vicente Vázquez, mantivo unha xuntanza con representantes da Fundación Down Compostela.

Dende Down Compostela reiteraron a demanda, compartida polo Consello Comarcal, de que se establezan desde a Administración Local, dentro da reserva de emprego público destinada a persoas con discapacidade, unha reserva propia destinada a persoas con discapacidade intelectual, que concorrerían mediante probas adaptadas.

É necesario que o Concello se involucre na defensa dos dereitos das persoas con discapacidade intelectual, máis aló de manter un convenio e de colaborar en actos. Por obriga coas veciñas e veciños esiximos ao goberno local que se opoña aos continuos recortes que a cidadanía está a padecer.

Defensa Sanidade Pública

O CONSELLO COMARCAL  DE ESQUERDA UNIDA COMPOSTELA REITERA A SÚA LOITA EN DEFENSA DUNHA SANIDADE PÚBLICA DE CALIDADE E GRATUÍTA.

O CONSELLO COMARCAL DE EU COMPOSTELA DEMANDA AO CONCELLO QUE SE IMPLICE TODO O POSIBLE NA DEFENSA DO DEREITO DE TODAS AS VECIÑAS E VECIÑOS A UNHA SANIDADE PÚBLICA.

O Consello Comarcal de Esquerda Unida Compostela considera necesario que todas as administracións se comprometan a ser garante dun sistema sanitario publico e de calidade, que protexa o dereito universal a saúde sen restricións de ningunha clase..

Nos últimos tempos a cidadanía vimos sufrindo continuos ataques ao sistema sanitario público como consecuencia das políticas de recortes de recursos, e da introdución de formas de privatización máis ou menos encubertas.

Por outra banda a promulgación do Real Decreto 16/2013 supuxo unha contrarreforma gravísima que racha co dereito a unha sanidade e universal e equitativa. No caso do goberno galego o Programa Galego de Protección Social da Saúde Pública (PGPSSP),  o programa que debe garantir a atención sanitaria ás persoas inmigrantes en situación de irregularidade administrativa residentes en Galicia, non supuxo máis que un parche ineficaz que deixa de facto a miles de persoas nunha grave situación de desamparo sanitario.

Normalización lingüística

O CONSELLO COMARCAL DE EU COMPOSTELA CRITICA QUE O CONCELLO NON DÉ BO USO DO GALEGO NAS ACTIVIDADES NAS QUE COLABORA

EU COMPOSTELA DEMANDA QUE SE CREE UN PLAN DE NORMALIZACIÓN LINGÜÍSTICA ADECUADO AO CONTEXTO ACTUAL

Para O Consello Comarcal de Esquerda Unida Compostela a defensa do galego, é e será sempre primordial, buscando así a súa correcta normalización.

Por desgraza, a realidade do galego é completamente a contraria da que esta organización desexara. O idioma galego cada día retrocede en número de falantes, debido aos diferentes estereotipos que o envolven e ás malas ou inexistentes políticas de normalización da Xunta de Galicia.

En realidade, parece que as políticas que se impulsan son para prexudicar ao galego, e a exemplos como o Decreto do Plurilingüísmo da Xunta, ou que a USC, na cal segundo datos do 'Cartafol Dixital' só o 23% das aulas é na nosa lingua, siga cun Plan de Normalización Lingüística que rematou no 2010, podemos sumar accións como a do Concello de Compostela, o cal non se molesta en usar o galego para as súas actividades.

Papeleiras en Bonaval

O Consello Comarcal de Esquerda Unida Compostela considera que o Concello debe garantir que os espazos públicos da cidade estean debidamente acondicionados para que as veciñas e veciños poidan disfrutalos.

Por suposto defendemos que se promova que Santiago sexa cada vez máis una cidade verde e sustentable medioambientalmente. Pero o ecoloxismo non só se basea na creación de novos parques e zonas verdes, ao igual que non é suficiente a colocación de plantas polas rúas urbanizadas da cidade para que a contaminación diminúa. O Concello é consciente disto, sendo este ámbito da súa política outro punto pendente da súa nefasta xestión.

A nosa cidade debe seguir avanzando en políticas verdes como a loita contra a contaminación lumínica ou a polución dos vehículos que por ela transitan, reivindicacións xa antigas desta organización e do movemento ecoloxistas. Estes son só algúns dos exemplos que reivindicamos, mais nesta ocasión só nos centraremos nunha exixencia en concreto: a falta de papeleiras para o lixo no parque de Bonaval.

Apoio á Asociación Cidade Vella

O CONSELLO COMARCAL DE EU CRITICA A ACTITUDE DO CONCELLO CON RESPECTO Á CULTURA NA CIDADE,  E PIDE QUE SE RENOVE O CONVENIO COA ASOCIACIÓN CIDADE VELLA

O CONSELLO COMARCAL DE EU COMPOSTELA ESIXE QUE O CONCELLO DEFENDA E PROMOVA A CULTURA DE BASE EN TODA A CIDADE.

O Consello Comarcal de Esquerda Unida Compostela manifesta a necesidade de que o Concello sexa parte activa na promoción e fomento da cultura na cidade.

O actual goberno municipal, coa súa administración de recortes e de mala xestión continuada, está a matar a actividade cultural da cidade de Santiago, con exemplos como a nova lexislación do uso do espazo público.

A isto sumouse o luns  17 de marzo un novo ataque, neste caso á actividade musical da zona vella, cando un membro da 'Asociación Cidade Vella' recibiu unha multa de 1.500€ por un concerto levado a cabo no seu local.

Moción reforma artigo 135 da Constitución

O Consello Comarcal de Esquerda Unida Compostela defende que a política ten que estar ao servizo da maioría social, procurando unha sociedade xusta e igualitaria .

O pacto que alcanzaron o PSOE, entón no Goberno, e o PP, principal partido da oposición, permitiu, sen sequera un referendo cidadán, a constitucionalización do principio de estabilidade orzamentaria a través da modificación do artigo 135 da nosa Carta Magna. Desta forma, facíase evidente a vulneración doutros principios constitucionais esenciais na construción do noso Estado autonómico, social e de dereito.

Por exemplo, lesionábanse as capacidades de autogoberno que teñen no noso modelo estatal as Comunidades Autónomas e as entidades locais; é dicir, que a consagración deste principio de estabilidade orzamentaria, e das obrigas que del se derivan, por riba de todos os demais, atenta claramente contra a autonomía da política e a autonomía financeira das Comunidades Autónomas e das entidades locais e vailles a impedir seguir prestando, asumindo e desenvolvendo todas aquelas competencias que a propia Constitución e as leis básicas de organización lles atribúen.

Pregunta Democracia Participativa e Orzamentos Participativos

O Consello Comarcal de Esquerda Unida Compostela defende a necesidade de implementar prácticas participativas que vigoricen a democracia que agora temos, e dean maior capacidade de influencia á cidadanía, por exemplo, no día a día da súa cidade.

Para o Consello Comarcal de EU é necesaria unha revolución democrática que so será posible apostando decididamente pola Democracia Participativa. Hai que levar a cabo o proceso de elaboración colectiva dun novo Regulamento de Participación Cidadá, que, por exemplo, debería dispor de aspectos como:

Unha carta de dereitos das veciñas e veciños, tales como, o dereito de petición, de intervención nas sesións públicas, de consulta ou referendo e o dereito á información, ademais dos dereitos que a través da participación cidadá se decidan.

Moción 8M

Para a Área de Mulleres de Esquerda Unida Compostela asistimos a un dos momentos históricos de maior ataque aos dereitos das mulleres. A dereita ataca as bases da democracia, como a aspiración a que temos dereito todas as persoas a da liberdade, a autonomía  persoal, o acceso aos recursos e a igualdade entre todos os seres humanos.

Esta grave regresión manifestase de modo categórico respecto aos dereitos humanos das mulleres, froito das posicións máis retrógradas do sistema patriarcal, que, coa escusa da crise económica, viu as posibilidades abertas para destruír o acadado.

A retrógrada formulación sobre o dereito ao aborto e aos dereitos sexuais e reprodutivos das mulleres que representa o anteproxecto da lei que defende o Goberno do Partido Popular, deixa ao descuberto a especial saña do emprego da política contra os dereitos das mulleres. O intento de forzar a maternidade ou que se aborte clandestina e perigosamente, é a expresión máis cruenta da consideración patriarcal, androcéntrica e misóxina do goberno e do seu Ministro de Xustiza.

Petición dimisión sete concelleiros e concelleiras imputados por prevaricación

O CONSELLO COMARCAL  DE ESQUERDA UNIDA COMPOSTELA, DENDE O RESPECTO Á PRESUNCIÓN DE INOCENCIA, ESIXE A DIMISIÓN INMEDIATA DOS SETE EDÍS IMPUTADOS POR PREVARICACIÓN AO APROBAR O PAGO DO AVOGADO A ADRIÁN VARELA.

O CONSELLO COMARCAL DE EU COMPOSTELA DEMANDA A NÚÑEZ FEIJOO QUE ASUMA A SÚA RESPONSABILIDADE E GARANTA A GOBERNABILIDADE DA CIDADE.

O Consello Comarcal de Esquerda Unida Compostela pide a dimisión inmediata dos sete concelleiros e concelleiras imputados por prevaricación e aos que se lles vai abrir xuízo oral.

Como xa expuxeramos o pasado 29 de xuño, era unha barbaridade, nova mostra da decrepitude ética do Partido Popular, que se aprobara que as concelleiras e concelleiros, imputados por presuntos delitos de corrupción política, poidan acollerse a que sexan as veciñas e veciños cos seus impostos as que paguen a súa defensa.

Pero tal e como están a mostrar os acontecemento, esta medida, non so é inmoral, se non que según a propia xustiza hai indicios para que ademais sexa ilegal. O Concello non pode seguir así, é máis que evidente que o inepto equipo de goberno do Partido Popular é incapaz de gobernar a cidade.

Pregunta defensa laicismo

O Consello Comarcal de Esquerda Unida Compostela defende, dende o respecto as distintas crenzas relixiosas, o laicismo en todas as administracións e servizos públicos.

Por desgraza co (des)goberno do Partido Popular, tanto a nivel local, autonómico como estatal, cada vez e máis evidente que, no relativo a confesión católica, a separación entre as administracións públicas e a igrexa cada vez é máis tenue ou incluso inexistente.

Pouco máis se pode engadir para criticar a nefasta reformar da lei do aborto de Gallardón ou da adoctrinante e prexudical para o ensino público reforma LOMCE do ministro Wert.

Xuntanza con Quérote+

O CONSELLO COMARCAL DE EU COMPOSTELA REÚNESE CO CENTRO QUÉROTE+ DE SANTIAGO

O CONSELLO COMARCAL DE ESQUERDA UNIDA COMPOSTELA CONSIDERA NECESARIO MAIOR IMPLICACIÓN DAS INSTITUCIÓNS NA LOITA CONTRA A LGTBIFOBIA

O membro do Consello Comarcal de Esquerda Unida Compostela e responsable de Aleas EU-Compostela, Pablo Nieves, mantivo unha reunión coa Coordinadora-Psicóloga dos centros Quérote+ Noa Tilve Cabada, responsable do centro de Santiago.

Nesa reunión plantexouse varias cuestións relativas o funcionamento do centro Quérote respecto os usuarios da comunidade LGTBI da comarca de Santiago.

O obxecto da xuntanza era a de recadar información sobre si había algún tipo de programa adicado aos membros da comunidade LGTBI. Tanto a nivel educativo como asistencial. Tamén se fora detectado por parte do centro un aumento da prostitución entre a comunidade LGTBI por mor da situación de crise económica. Tamén para coñecer a porcentaxe de usuarios LGTBI atendido polo centro e as súas demandas.

Paneis informativos

O Consello Comarcal de Esquerda Unida Compostela cre que as as veciñas e veciños teñen dereito a expresarse e que o Concello debe garantir todos os medios necesarios para que isto sexa posible.

As novas tecnoloxías e internet fixeron evolucionar en poucos anos os métodos cotiás de comunicación da sociedade, facilitando o acceso a todo tipo de información e chegando a maiores sectores da poboación de forma máis rápido. Sen embargo este avance na forma de informar non pode ser utilizado para non facilitar outros medios para dar a coñecer eventos, manifestacións e outras actividades.

Deste xeito, hoxe en día seguen a ser moi comúns e útiles os paneis informativos para comunicación social situados na vía pública, posto que é un medio moi accesible para anunciar algo ou mesmamente expresarse.

Xuntanza coa Federación ANPAS Compostela

O CONSELLO COMARCAL  DE ESQUERDA UNIDA COMPOSTELA MANTÉN UNHA XUNTANZA COA FEDERACIÓN ANPAS COMPOSTELA.

O CONSELLO COMARCAL DE EU COMPOSTELA ESIXE AO CONCELLO QUE CUMPRA COA SÚA OBRIGA E MANTEÑA OS COLEXIOS DA CIDADE EN CORRECTAS CONDICIÓNS PARA GARANTIR UN ENSINO PÚBLICO DE CALIDADE.

Os membros do Consello Comarcal de EU Compostela, José María Tubío e Vicente Vázquez, mantiveron un encontro con representantes da Federación de ANPAS Compostela.

No comezo da xuntanza dende a Federacións de ANPAS expuxeron as graves deficiencias no mantemento dos colexios públicos que está a acontecer na cidade. Como claro exemplo desta situación está o colexio Montes dos Postes, que según o indicando na xuntanza urxe reparacións de inmediato para garantir unhas condicións mínimas que garantan a seguridade e saúde do alumnado.

Por desgraza o deficitario mantemento das escolas das cidade vai máis aló deste caso, sendo habitual nestas instalacións públicas problemas con pingueiras, coa calefacción ou, por exemplo, cos servizos.