martes, 8 de abril de 2014

Xuntanza con Down Compostela



O CONSELLO COMARCAL  DE ESQUERDA UNIDA COMPOSTELA MANTÉN UNHA XUNTANZA COA FUNDACIÓN DOWN COMPOSTELA.

O CONSELLO COMARCAL DE EU COMPOSTELA DEMANDA A ELABORACIÓN DUN PLAN LOCAL PARA A INCLUSIÓN SOCIAL DE PERSOAS CON DISCAPACIDADE.

O coordinador comarcal de Esquerda Unida Compostela, Vicente Vázquez, mantivo unha xuntanza con representantes da Fundación Down Compostela.

Dende Down Compostela reiteraron a demanda, compartida polo Consello Comarcal, de que se establezan desde a Administración Local, dentro da reserva de emprego público destinada a persoas con discapacidade, unha reserva propia destinada a persoas con discapacidade intelectual, que concorrerían mediante probas adaptadas.

É necesario que o Concello se involucre na defensa dos dereitos das persoas con discapacidade intelectual, máis aló de manter un convenio e de colaborar en actos. Por obriga coas veciñas e veciños esiximos ao goberno local que se opoña aos continuos recortes que a cidadanía está a padecer.

É lamentable que polas políticas austericidas do PP, haxa familias, por exemplo, que antes levaban cinco días aos seus fillos a esta institución, e polos recortes no transporte do 065 agora se vexan na obriga de reducir estes días.

Por desgraza son múltiples os ataques que o Partido Popular perpetra contra a cidadanía en xeral, e as persoas con discapacidade intelectual en concreto. O último, se por decencia o goberno central non recúa, e unha lei de subvencións que conta co rexeitamento das distintas organización que traballan no terceiro sector.

Dende o Consello Comarcal de Esquerda Unida Compostela reiteramos que o Concello, como calquera outra Administración Pública, ten que ser parte activa e garantir os dereitos de todas as veciñas e veciños. Por iso demandamos, como xa levábamos no noso programa electoral, que é necesario, a través da participación cidadá, a elaboración dun Plan Local para a Inclusión Social das Persoas con Discapacidade.

No hay comentarios: