Acto Pontepedriña

MARÍA ROZAS MANIFESTA QUE OS ORZAMENTOS SON O CORAZÓN QUE DA VIDA A UNHA CIDADE DE TODAS E PARA TODAS AS PERSOAS, AS VECIÑAS E VECIÑOS CODECIDIREMOS COMO DEBE INSVESTIR O CONCELLO OS CARTOS PÚBLICOS.

COMPOSTELA ABERTA TEN PROPOSTAS, NON VACUAS PROMESAS, PARA REVITALIZAR A VIDA COLECTIVA NOS BARRIOS.

Martiño Noriega e María Rozas, xunto con Xan Duro, proseguindo cos encontros con distintos barrios da cidade, escoitaron as propostas e queixas que manifestaron as veciñas e veciños de Pontepedriña.

CA propón no seu programa recuperar os barrios para a veciñanza, é necesario dotalos de espazos públicos que faciliten a vida colectiva. Dende o parque infantil ata a mellora do CSC, Pontepedriña debe beneficiarse de medidas que colaboren a satisfacer as demandas expresadas polas veciñas e veciños.

Para María Rozas “as persoas que decidimos formar parte de CA o fixemos polo compromiso de poder facer as cousas doutra maneira, móvemos a ilusión por recuperar o Concello para a maioría social, facendo propostas concretas e posibles, non vacuas promesas”.

Actos en Marantes e Carballal

MARÍA ROZAS DENUNCIA A DEFICIENTE FINANCIACIÓN PARA O RURAL DE COMPOSTELA, OS ORZAMENTOS MUNICIPAIS NON SATIFACEN AS DEMANDAS DAS VECIÑAS E VECIÑOS.

É NECESARIA, ENTRE OUTRAS MEDIDAS, A DESCENTRALIZACIÓN DE SERVIZOS E UN PLAN DE MOBILIDADE SUTENTABLE QUE ATENDA ÁS NECESIDADES DA VECIÑANZA.

María Rozas, xunto con Jorge Duarte e Rafa Peña, participou nos encontros de Compostela Aberta coa veciñanza de Marantes e Carballal, escoitando as distintas propostas e denuncias que dende o rural compostelá manifestan.

A descentralización de servizos, entre outras, é unha das medidas que se consideran necesarias para mellorar a realidade das parroquias. Recuperar as antigas oficinas de Enfestas na que, por exemplo, prestar servizos de asesoramento xurídico, axudaría a mellorar a situación de vida das veciñas e veciños, sentíndose parte o concello non cidadanía de segunda.

María Rozas denunciou que “os orzamentos municipais rexistran un investimento de 35,8 euros por habitante no rural, cando para a zona urbana é de 153 euros por habitante”. Acreditando a enorme diferenza na prestación de servizos que padecen as persoas que viven nas parroquias de Santiago, sendo necesario un plan de actuación que atenda as súas demandas.

Apoio Feira Primavera de San Pedro

O CONSELLO COMARCAL  DE ESQUERDA UNIDA COMPOSTELA CENSURA A ACTITUDE DO CONCELLO COA ASOCIACIÓN DE FESTAS DO BARRIO DE SAN PEDRO.

O CONSELLO COMARCAL DE EU COMPOSTELA CRITICA QUE O CONCELLO PAREZA ESTAR BUSCANDO DAÑAR AS ACTIVIDADES DE BARRIO E OS ATRACTIVOS TURÍSTICOS DA CIDADE.

Durante estes catro anos, dende o Consello Comarcal de Esquerda Unida Compostela vimos denunciando os constantes atropelos do Concello. Dende lexislacións municipais restritivas ata a súa endémica corrupción, estes catro anos son catro anos perdidos para a cidade, catro anos de desgoberno e mofa.

Agora, cando esta lexislatura remata e hai posibilidades de cambio, parece que o Partido Popular quere morrer matando, e agora o seu obxectivo foi a Feira de Primavera de San Pedro. A Comisión de Festas de dito Barrio vén de denunciar que o Concello déixaos sen acceso ás tomas de luz, supostamente por impedimentos legais, perigando así os concertos e iluminación da festa.

Coma de costume, o PP e o alcalde da cidade, Agustín Hernández, buscan eludir as súas responsabilidades e facer o que se lles antolle, en lugar de poñerse a traballar para solucionar esta problemática que non é menor, posto que a Feira da Primavera é un acontecemento moi coñecido na cidade e arredores e supón un beneficio económico moi importante para as persoas que residen e traballan nese barrio.

Xuntanza coa AV de San Pedro A Xuntanza

REPRESENTANTES DE ESQUERDA UNIDA COMPOSTELA REÚNENSE COA A.V. A XUNTANZA PARA A ELABORACIÓN COLECTIVA DO PROGRAMA POLÍTICO DAS MUNICIPAIS

O CONSELLO COMARCAL DE EU COMPOSTELA REITERA A NECESIDADE DE ARTICULAR OS MECANISMOS DE INFORMACIÓN E PARTICIPACIÓN, PARA QUE AS VECIÑAS E VECIÑOS SEXAN PARTÍCIPES Á HORA DE BUSCAR SOLUCIÓNS PARA O SEU BARRIO.

Os representantes do Consello Comarcal de Esquerda Unida Compostela, José María Tubío e Vicente Vázquez, mantiveron un encontro coa AV A Xuntanza, dentro do programa de visitas ao tecido asociativo da cidade para coñecer de primeira man as necesidades do barrio e no proceso participativo de elaboración colectiva do programa das municipais de maio do 2015 .

Consideramos labor prioritaria do Concello fomentar a participación da veciñanza nas actividades que incumban ao seu barrio e establecer espazos e instrumentos para os procesos de reclamacións e suxestións.

Dende o Consello Comarcal de EU Compostela apoiamos a demanda dun Centro Socio Cultural no barrio de San Pedro. É necesaria a construción dun espazo publico con salón de actos e outras salas habilitadas para dar servizo ás diferentes actividades do barrio. Reiteramos tamén o noso apoio á proposta de converter o CSC da Trisca nun lugar destinado ás persoais maiores contribuíndo a que teñan unha vida autónoma e enriquecedora.

Xuntanza coa AV de Pelamios As Brañas de Andrés

REPRESENTANTES DE ESQUERDA UNIDA COMPOSTELA REÚNENSE COA A.V. AS BRAÑAS DE ANDRÉS PARA ATENDER ÁS DEMANDAS VECIÑAIS DE MELLORA DO BARRIO

O CONSELLO COMARCAL DE EU COMPOSTELA DENUNCIA A INCOMPETENCIA DUN CONCELLO SOMETIDO AOS INTERESES ELECTORALISTAS DO SEU ALCALDE

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AV As Brañas de Andrés proseguindo cos encontros co tecido asociativo e veciñal da cidade para coñecer de primeira man as necesidades dos barrios e parroquias do municipio ao mesmo tempo que facelo partícipe do proceso de elaboración colectiva do programa das municipais de maio do 2015.

Unha vez máis queda claro que os intereses electoralistas de Agustín Hernández, alcalde dedocrático de Compostela, están privando aos barrios tradicionais de Compostela dos elementos necesarios para a cohesión social e territorial. A veciñanza experimenta que non recibe o mesmo trato ca outras zonas da cidade, consideradas prioritarias para un equipo de goberno preocupado, unicamente, pola cita electoral de maio de 2015.

Xuntanza coa AV Pontepedriña

ESQUERDA UNIDA COMPOSTELA REÚNESE COA A.V. PONTEPEDRIÑA PARA A ELABORACIÓN COLECTIVA DO PROGRAMA POLÍTICO DAS MUNICIPAIS

O CONSELLO COMARCAL DE EU COMPOSTELA DEFENDERÁ UNHA MELLOR PLANIFICACIÓN DOS USOS DOS ESPAZOS PÚBLICOS E UNHA POLÍTICA  DE CALIDADE DA MOBILIDADE E DA ACCESIBILIDADE DO BARRIO.

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AV Pontepedriña, dentro do programa de visitas ao tecido asociativo da cidade para coñecer de primeira man as necesidades do barrio e facelo partícipe no proceso de elaboración colectiva do programa das municipais de maio do 2015 .

Son numerosas as eivas do barrio que seguen manifestándose ano tras anos, debido a un concello ineficaz, distanciado dos barrios tradicionais. O Concello semella ollar os resultados das pasadas eleccións municipais á hora de facer política municipal. Os veciños e veciñas do barrio non merecen esta actitude electoralista.

Beirarrúas non axeitadas, non accesibles, que dificultan o transito de persoas maiores ou con problemas de mobilidade; problemas de mobilidade e accesibilidade que se repiten en rúas pechadas, con promesas de accesos peonís a través da estación de tren que nunca se levan a cabo; idéntica mala conectividade coas Brañas do Sar, unha fallida ruta de sendeirismo; alumeado público deficiente en varios puntos do barrio; limpeza das beirarrúas igualmente inaxeitada e deficitaria; problemas de seguridade viaria en Clara Campoamor, Amor Ruibal e Camilo Otero; actuar na rúa Xoan Nogueira conforme aos resultados do referendo veciñal que tivo lugar hai máis de un ano; mala xestión do espazo coñecido como a Lagoa; escombreiras improvisadas como na rúa Boqueixón; problemas de contaminación do rio Sar por unha mala praxe depurativa; situacións de feísmo e de seguridade coas casas abandonadas presentes no barrio.

Xuntanza coa AVV do Castiñeiriño

REPRESENTANTES DE ESQUERDA UNIDA COMPOSTELA REÚNENSE COA A.VV. O CASTIÑEIRO DO CASTIÑEIRIÑO PARA A ELABORACIÓN COLECTIVA DO PROGRAMA ELECTORAL DAS MUNICIPAIS

O CONSELLO COMARCAL DE EU COMPOSTELA DENUNCIA REITERA A NECESIDADE, MEDIANTE A DEMOCRACIA PARTICIPATIVA, DE QUE AS VECIÑAS E VECIÑOS POIDAN COLABORAR PARA SOLUCIONAR OS PROBLEMAS DA SÚA RÚA, DO SEU BARRIO, DA CIDADE

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AVV do Castiñeiriño, dentro do programa de visitas ao tecido asociativo da cidade para coñecer de primeira man as necesidades do barrio e facelo partícipe no proceso de elaboración colectiva do programa das municipais de maio do 2015 .

Unha vez máis comprobamos que o goberno local do PP, do dedocrático alcalde Agustín Hernández, non escoita as veciñas e veciños, non fai partícipe ao barrio na toma de decisións. Desde que chegou ao goberno local, o Alcalde adoptou unha actitude de desleixo para cos barrios e parroquias tradicionais da cidade.

As veciñas e veciños deben ser partícipes do día a día da cidade, na toma das decisións que máis lle afectan no día a día. E, tal como acontecía coa AV Escultor Francisco Asorei, a AV do Castiñeiriño amosou a súa preocupación pola actual política dun Alcalde decidido a levantar toda a cidade e sitiala de obras, con tal de vencer a memoria da veciñanza sobre os 3 primeiros anos de corrupción e parálise. Mais a veciñanza non é tan desmemoriada como quere o Alcalde, e o DOG e co BOE non poden silenciar tantos anos de deriva e naufraxio da democracia.

Crítica á xestión do PP en Carreira do Conde

ESQUERDA UNIDA COMPOSTELA REITERA, UNHA VEZ MÁIS, QUE A DEMOCRACIA PARTICIPATIVA TEN QUE SER UNHA REALIDADE PARA FACER PARTÍCIPE AS VECIÑAS E VECIÑOS DAS ACTUACIÓNS QUE ACOMETE O CONCELLO

O CONSELLO COMARCAL DE EU COMPOSTELA DENUNCIA A NEFASTA XESTIÓN DO PARTIDO POPULAR NAS OBRAS DE CARREIRA DO CONDE.

Para o Consello Comarcal de Esquerda Unida Compostela a incompetencia mostrada polo goberno local do Partido Popular nas obras de Carreira do Conde, demostra, unha vez máis, a execrable xestión do dedocrático alcalde Agustín Hernández, que tanto dano fai a Santiago.

En primeiro lugar, é inadmisible, como xa ten ocorrido en outros moitos barrios da cidade, a falta de información coa que actúa o PP nas medidas que toma. As veciñas e veciños teñen o dereito a que o Concello, como mínimo, avise en tempo e forma, por exemplo, das obras que se van acometer no seu barrio.

Por suposto, para Esquerda Unida é necesario ir moito máis aló, e facer real a Democracia Participativa, coa que conseguir, non so que a xente teña a información que demanda, se non que sexa partícipe das medidas que se acometan, colaborando activamente para achar as mellores solucións ante as eivas que poidan existir na súa rúa, no seu barrio, na cidade.

Xuntanza coa AVV Francisco Asorey da Almáciga

ESQUERDA UNIDA COMPOSTELA REÚNESE COA A.VV. FRANCISCO ASOREY DA ALMÁCIGA PARA A ELABORACIÓN COLECTIVA DO PROGRAMA ELECTORAL DAS MUNICIPAIS

O CONSELLO COMARCAL DE EU COMPOSTELA DENUNCIA QUE O GOBERNO LOCAL DO PP COVIRTE A ALMÁCIGA NUN BARRIO DE OBRAS ABANDONADAS OU ESQUECIDAS

Os representantes do Consello Comarcal de Esquerda Unida Compostela, Xabier Ron e Vicente Vázquez, mantiveron un encontro coa AVV Francisco Asorey da Almáciga, dentro do programa de visitas ao tecido asociativo da cidade para coñecer de primeira man as necesidades do barrio e facelo partícipe no proceso de elaboración colectiva do programa das municipais de maio do 2015 .

A xestión do equipo de goberno de local do PP neste barrio é nefasta e totalmente lesiva para cos intereses da veciñanza. É inaceptable que, sen informar debidamente á veciñanza, se paren as obras de acondicionamento do Parque da Almáciga. O parque, agora mesmo, ofrece un estado lamentable que, de non realizarse as obras precisas, empeorará e farán inútil o traballo realizado ate o de agora. Xa leva dous meses sen iluminación. E o Alcalde, en vez de asumir o goberno, dilles aos veciños e veciñas que falen coa empresa que realiza as obras.

Os accesos do Parque son perigosísimos para a saúde das persoas. Nun só día de choiva o parque converteuse nunha lodeira que correu cara abaixo por non existir ningunha obra axeitada de canalización de augas. As árbores non se podan desde hai anos: algunha delas déitase enriba do tellado do local da asociación veciñal.

Xuntanza coa A.VV. Raigame do Ensanche

O CONSELLO COMARCAL DE ESQUERDA UNIDA COMPOSTELA MANTÉN UNHA XUNTANZA COA A.VV. RAIGAME DO ENSANCHE.

O CONSELLO COMARCAL DE EU COMPOSTELA COMPARTE AS RECLAMACIÓNS VECIÑAIS RESPECTO ÁS MELLORAS URBANÍSTICAS QUE NECESITA O BARRIO.

O representante do Consello Comarcal de Esquerda Unida Compostela, Vicente Vázquez, proseguindo co programa de reunións co tecido asociativo da cidade mantivo unha xuntanza con representantes da A.VV. Raigame do Ensanche.

Na xuntanza, consistente nun percorrido por diferentes zonas do Ensanche, os representantes da AV manifestaron que esta zona de Santiago necesita actuacións de mantemento e reurbanización con urxencia.

Unha das reclamacións, que conta co total apoio do Consello Comarcal de Esquerda Unida Compostela, é a necesidade de que os colectores de lixo na r/ Nova de Abaixo nº17 volvan estar soterrados, esixindo ao Concello que actúe de inmediato e atenda as demandas da A.VV. posto que elevaron xa tres escritos ao equipo de goberno para que actúe e solucione o problema.

Tamén compartimos a necesidade  de reurbanizar as escaleiras que unen a r/ Nova de Abaixo con Rosalía de Castro e que presentan un lamentable estado de sucidade e abandono pese ao gran transito diario de persoas que as utilizan.

Dende o Consello Comarcal de Esquerda Unida Compostela esiximos, ao igual que dende fai tempo o pide a A.VV: Raigame, un plan de actuación na Praza de Vigo que acometa as obras necesarias de mellora que este espazo público necesita.

Outra actuación necesaria e moi urxente para o Ensanche é o arranxo de estradas e beirarrúas, cuxo lamentable estado supón, en moitos casos, un grave risco para a seguridade das veciñas e veciños.

Outra petición da A.VV:, debidamente rexistrada e que o Consello Comarcal de EU comparte, é a necesidade de solucionar os problemas que poidan existir nos urinarios públicos situados na Alameda, que a día de hoxe seguen pechados, sen data coñecida de reapertura, polo que demandamos ao concello que leve a cabo as medidas necesarias para acometer o antes posible a posta en funcionamento destas instalacións.

Por último, entre as moitas propostas feitas polos representantes da A.VV: Raigame, dende o Consello Comarcal de EU Compostela queremos destacar a necesidade de instalar unha marquesiña na parada nº 694 situada na r/ do Hórreo, xusto antes do Ambulatorio, e que é moi utilizada, por exemplo, por pacientes crónicos de tratamento diario ou dependentes e acompañantes que se ven na obriga de padecer as inclemencias do tempo nunha parada sen ningún abrigo

Xuntanza coa AV "A Xuntanza"

O CONSELLO COMARCAL DE ESQUERDA UNIDA COMPOSTELA PROSEGUE AS REUNIÓNS CO TECIDO ASOCIATIVO DE SANTIAGO MANTENDO UNHA XUNTANZA COA AV DO BARRIO DE SAN PEDRO “A XUNTANZA”.

O CONSELLO COMARCAL DE EU COMPOSTELA REITERA A NECESIDADE DE CONQUISTAR A DEMOCRACIA PARTICIPATIVA E A OBRIGA DO CONCELLO A SER TRANSPARENTE E A INFORMAR.

Os representantes do Consello Comarcal de Esquerda Unida Compostela, Noel Dopazo, Xenxo Redondo e Vicente Vázquez, proseguindo co programa de reunións co tecido asociativo da cidade mantiveron unha xuntanza coa directiva da AV “A Xuntanza”.

Un dos temas tratados nesta xuntanza, como xa se fixera na anterior mantida con este colectivo en febreiro de 2011, foi o Urbana Norte, do que manifestaron os representantes da AV que se desvincularan debido a certas cuestións sobre o seu funcionamento.

O Consello Comarcal de EU Compostela sempre manifestou as súas queixas pola deficiente xestión levada a cabo con este proxecto e, sobre todo, polos ineficaces ou inexistentes mecanismos para converter o Urbana Norte nun modelo de participación cidadá na toma de decisións.

O tema que acaparou a maior parte da xuntanza foi o tema das obras que, se non volve haber retrasos, comezaran en uns meses na rúa de San Pedro.

O Consello Comarcal comparte totalmente as reivindicacións do colectivo veciñal de que calquera medida que se tome nesta rúa ten que pasar inexorablemente por unha diminución drástica do transito de vehículos e cara a maior peatonalización posible, se non pode ser total, desta rúa.

Pero o que non pode ocorrer é que, por mor do gasto que vai supoñer as obras nas rúas de San Pedro, non se acometan obras urxentes que “A Xuntanza” reclama, como o arranxo inmediato das beirarrúas de Quiroga Palacios, dado que o seu lamentable estado supoñen un claro risco para as veciñas e veciños.

Tamén compartimos a proposta exposta pola directiva da AV de que o Concello debe tratar de inmediato a cuestión do envellecemento, que ocorre tanto neste barrio como en outros moitos da cidade, para levar a cabo medidas para colaborar nunha vida autónoma e enriquecedora das persoas maiores.

Por último ante a información recibida de que o Concello xa non colaboraba economicamente no pago do aluguer do local social da AV, que, como comprobamos onte, ten unha gran actividade, consideramos lamentable que, baixo a escusa da crise, o equipo de goberno do PP suprima no 100% a partida orzamentaria para o pago deste aluguer, obrigando a AV a un gran esforzo para manter a súa gran labor social.

Xuntanza coa AV do Castiñeiriño

O CONSELLO COMARCAL DE ESQUERDA UNIDA COMPOSTELA PROSEGUE AS REUNIÓNS CO TECIDO ASOCIATIVO DE SANTIAGO MANTENDO UNHA XUNTANZA COA AV DO CASTIÑEIRIÑO.

O CONSELLO COMARCAL DE EU COMPOSTELA COMPARTE AS RECLAMACIÓNS VECIÑAIS RESPECTO Á SEGURIDADE VIARIA, MELLORA DE INFRAESTRUTURAS E SERVIZOS PÚBLICOS.

Os representantes do Consello Comarcal de Esquerda Unida Compostela, Xenxo Redondo e Vicente Vázquez, mantiveron unha xuntanza coa directiva da AV “O Castiñeiro” do Castiñeiriño.

No transcurso da xuntanza confirmouse que as demandas veciñais expresadas polos representantes da AV, son moi similares ás expresadas en novembro de 2010 na anterior xuntanza.

Como non podía ser doutro xeito unha dos principais temas de conversa foi a rúa Virxe Branca, cuxo estado despois das choivas dos últimos día é lamentable, e ata pon en risco ás veciñas e veciños, pois comentaron varias caídas polo deficiente mantemento das beirarrúas.

Sen entrar a comentar a lamentable xestión do PP, pública e notoria, sobre esta rúa, o Consello Comarcal de Esquerda Unida Compostela esixe unha rápida solución para a veciñanza afectada, mostrando o noso total apoio as medidas que, debatidas en asemblea, decidan tomar as persoas afectadas polo estado da rúa Virxe Branca.

Tamén esiximos unha rápida actuación en temas de melloras no relativo a urbanismo e infraestruturas, que os representantes da AV expuxeron, e que van dende colocar placas cos nomes da rúa, arranxo de beirarrúas e estradas en diferentes lugares do barrio, ate actuacións de urxencias en casas abandonadas que supoñen un risco para a seguridade.

Outra cuestión que segue a ser reclamada, dado o aumento de poboación, e a que pode chegar a vir se todas as urbanizacións proxectadas son construídas, e a necesidade de dotar ao barrio cos servizos públicos necesarios, concretamente, tal e como xa expresaran na xuntanza de novembro de 2010, dunha gardería e un centro de día.

Demandas que compartimos completamente e que, por suposto, apoiamos sempre baixo a titularidade e xestión pública.

Por último o Consello Comarcal de Esquerda Unida Compostela manifestou o seu apoio as mobilizacións e actuacións que se poidan levar a cabo, se, por problemas entre empresas privadas, se acomete a posible alteración do percorrido da liña 6 do transporte urbano, recortando o seu percorrido e prexudicando ás veciñas e veciños da zona.

de la Fuente, Noya e as facturas

O CONSELLO COMARCAL DE ESQUERDA UNIDA COMPOSTELA LAMENTA A DECREPITUDE ÉTICA Á QUE ESTÁ A SOMETER O PP AO CONCELLO.

ESQUERDA UNIDA COMPOSTELA SOLICITA QUE O CONCELLEIRO DE PARTICIPACIÓN CIDADÁ ASUMA AS SÚAS RESPONSABILIDADES E INVESTIGUE AS ACTIVIDADES DE JUAN DE LA FUENTE.

O Consello Comarcal de Esquerda Unida Compostela reclama que o goberno local do Partido Popular cumpra co seu labor e investigue debidamente os diferentes procedementos administrativos levados a cabo polo concelleiro Juan De la Fuente

En primeiro lugar, consideramos inadmisibles e lamentables as verbas do concelleiro Francisco Noya, expoñendo que o que investigarán é a filtración, pero non a factura en sospeita porque a efectos económicos non ten relevancia.

Pode ser que para Feijoó o que acontece no Concello non sexa normal, o que é seguro é que para a maioría social da cidade a decadencia e o desprestixio ao que esta a levar o PP a Santiago é perxudicial ate para a mesma Democracia.

Por iso é incomprensible que o Partido Popular faga público o seu posicionamento, ante un novo caso de posible corrupción no seu partido e nas prácticas de goberno, a través do comunicado polo concelleiro Noya,  que argumenta que o que realmente pode preocupar á cidadanía, e polo que ten que recabar información, é a filtración a un medio de comunicación da factura.

En que mundo vive este concelleiro??!! Esiximos ao señor Noya que asuma as súas responsabilidades políticas inherentes ao seu cargo e que investigue os diferentes procedementos administrativos levados a cabo polo concelleiro Juan de La Fuente; en caso contrario, debería renunciar ao cargo e deixar de desprestixiar ao Concello de Santiago.

En segundo lugar, o concelleiro Juan de la Fuente está amosando unha actitude contraria ás normas éticas que conleva o seu cargo, tal como demostrou coa súa neglixente actuación –e posterior xustificación- na rúa Virxe Branca, que provocou que mesmo María Pardo tivera que desautorizalo. As mañas de Juan de la Fuente feitas públicas nestes días amosan que non merece tampouco ocupar un lugar nas ringleiras do equipo que debe gobernar o concello.e debera, tamén, renunciar ao seu cargo. Esiximos que dimita de forma inmediata.

Todo demostra que o equipo de goberno non é quen de levar as rendas da administración pública máis próxima dos veciños e veciñas compostelás. Todo isto acumúlase ao que levamos denunciando desde hai meses. Son múltiples os indicios de malas prácticas. Precisamos hixiene democrática. A cidadanía debe poder decidir.