Sala Yago

O CONSELLO COMARCAL DE ESQUERDA UNIDA COMPOSTELA CRITICA O DESUSO DA SALA YAGO COMO UN ESPAZO DE CULTURA DA E PARA A CIDADANÍA

O CONSELLO COMARCAL DE EU COMPOSTELA CONSIDERA NECESARIA A APERTURA INMEDIATA DA SALA YAGO E PIDE AO CONCELLO QUE ACTÚE E DEIXE DE POÑER ESCUSAS

O Consello Comarcal de Esquerda Unida Compostela, como xa vén expresando ao longo dos anos, critica a mala xestión dos espazos culturais por parte do Concello e demanda un xiro na política municipal a favor dunha cultura de base e participativa.

Os recortes, cambio na lexislación do uso da vía pública, privatizacións, etc, son un pequeno resumo do que está a pasar en Santiago con respecto aos espazos culturais da cidade, nun camiño que só pode levar a unha cultura afastada das veciñas e veciños.

Un dos casos máis coñecidos sobre isto sería a Sala Yago na Rúa do Vilar, un espazo que leva anos pechado e que, pese ás demandas da cidadanía e diferentes accións para esixir a súa reapertura, non parece que se vaia a escoitar á cidadanía.

Agardamos ata ver a reacción completa do Partido Popular para confirmar o escaso interese que mostra pola cultura. Non pode ser que ante unha protesta cidadá fronte un agravio que padece a cidade con esta sala pechada, e que ata o PP leva no seu programa electoral a súa apertura, a solución de Ángel Currás e o seu equipo sexa a represión e absolutamente nada sobre un plan de actuación para acadar que o Yago volva ser das veciñas e veciños.

Dende o Consello Comarcal de Esquerda Unida Compostela cremos que é lexítimo que a cidadanía leve a cabo actos de protesta, como esta ocupación, para mostrar claramente que as autoridades  non teñen interese en poñer espazos públicos ao servizo da cidadanía.

Por suposto, unha vez máis, dende o Consello Comarcal de EU Compostela esiximos a reapertura da Sala Yago de forma inmediata e pedimos ao Partido Popular que deixe de poñer escusas ás cidadás e cidadáns da cidade no que é unha reivindicación moi simple: a recuperación dos espazos culturais perdidos.