Expulsión XA de Juan de la Fuente

O CONSELLO COMARCAL DE ESQUERDA UNIDA COMPOSTELA REITERA A SUA DEMANDA DE DIMISIÓN OU CESE INMEDIATO DE JUAN DE LA FUENTE.

O CONSELLO COMARCAL DE EU COMPOSTELA ESIXE A CURRÁS QUE ACTÚE DEBIDAMENTE OU RENUNCIE Á ALCALDÍA.

O Consello Comarcal de Esquerda Unida Compostela reitera que Juan de la Fuente non pode seguir sendo concelleiro.

É inadmisible, tras coñecerse o informe pericial caligráfico, que este concelleiro se manteña no cargo, ou dimite ou é cesado de inmediato por Ángel Currás. As veciñas e veciños no teñen que soportar que a nefasta xestión do PP abafe o porvir desta cidade.

Por desgraza este informe é un paso máis na execrable situación que padecemos por mor de Juan de la Fuente, que demostra claramente a ineptitude do Partido Popular, non so para gobernar Santiago, se non para mostrar a mínima decencia para non desprestixiar a toda unha cidade.

Tal e como expuxeramos trala súa declaración xudicial, o pasado 4 de xuño, non negamos que sexa un dereito legal de calquera imputado negarse a declarar ante un xuíz, pero como cargo público, por ética e moral, Juan de la Fuente non debe facer uso dese dereito ao estar sometido á obriga ante a cidadanía de dar todas as explicacións que se lle esixan.

Unha vez máis, como xa levamos denunciando dende o 16 de marzo, respectando a súa presunción de inocencia, este concelleiro denigra á Institución local cos seus comportamentos e actuacións. Dimisión ou cese xa.

Por suposto se a decrepitude moral do señor Juan de la Fuente fai que se aferre ao cargo que ostenta, é obrigatorio que o alcalde Ángel Currás actúe de inmediato e, en primeiro lugar, o cese de todas as súas responsabilidades e, por suposto, censure publicamente a lamentable actuación deste concelleiro neste caso das facturas falsas e lle reclame a dimisión

Se o señor Currás mantén a súa covardía, que tanto está a prexudicar á maioría social desta cidade, e non actúa debidamente con Juan de la Fuente, debe dimitir como alcalde e concelleiro posto que queda inhabilitado para cargo público.

Por último reiterar que por hixiene democrática o futuro da cidade ten que decidilo as veciñas e veciños coa Democracia das urnas.

Por suposto, se o nefasto equipo de goberno local do PP, non ten a suficiente ética para botarse a un lado, polo ben da cidadanía, e reclamar a disolución do Concello e o adianto de eleccións municipais, deber ser o señor Feijoo o que ten que asumir as responsabilidades que implica ser o presidente da Xunta e, ante o dano que se está ocasionando á cidade, se obrigue a todos os cargos imputados nas tramas de corrupción investigadas pola xustiza, se ben respectando a súa presunción de inocencia, a dimitir e a demandar e conseguir o adianto de eleccións municipais.