ACTO POLA III REPÚBLICA,

O xoves 17 de abril, ás 19h, terá lugar no salón de actos da Facultade de Ciencias Políticas de Compostela un acto público para reivindicar a III República. No acto intervirán, Herminio Barreiro, vicepresidente do Foro pola Memoria Republicana de Galicia; Javier Navascués, director da Fundación de Investigacións Marxistas (FIM); Carlos Portomeñe, secretario xeral do Partido Comunista de Galicia.

Animamos a todas as persoas a que se acheguen.

Regularización semafórica rúa Pitelos con rúa do Hórreo

MOCIÓN

rexistrada hoxe no Concello de Santiago para o seu sometemento ao Pleno

Regularización semafórica rúa Pitelos con rúa do Hórreo

EXPOSICIÓN DE MOTIVOS

Desde que desapareceu a conexión ao tráfico rodado rúa Olvido con rúa da Ensinanza, a rúa Pitelos sofre, en horas puntuais, unha saturación de vehículos maior do que viña sendo habitual por mor de canalizar por dito vial máis tráfico rodado creando verdadeiros tapóns. Así, ao eliminar a subida de vehículos no último treito da rúa Pexego de Arriba, temos como resultado insufribles retencions do tráfico rodado na rúa Pitelos. Dito tráfico queda sempre en pendente e agardando a poderse incorporar á rúa do Hórreo, pero para facelo con garantías o primeiro vehículo invade normalmente o paso de peóns ocasionando molestias aos peóns que mesmo poden ser perigosas.

Entendendo que a seguridade viaria debe ser unha obriga, proponse ao Pleno do Concello de Santiago que adopte os seguintes:

ACORDOS

1. Instalar na rúa do Hórreo, á altura dos nº 19 e nº 28, semáforos con intervalo non coincidente cos que xa hai instalados á altura dos nº 13 e nº 20 e que se traduciría en que os primeiros (nº 19 e 28) pecharan un pouco antes (cuestión de segundos) cos mencionados (nº 13 e 20) para permitir que o fluxo de vehículos que veñen da rúa Pitelos se poidan ir situando nos tres carrís que hai no amplo dese treito de vía (de forma estimativa, permitiría a presenza de nove turismos).

Xunto con esta actuación, na confluencia entre rúa Pitelos e rúa do Hórreo, instalar dous semáforos, un a cada lado da rúa, en situación de intermitencia e tamén co intervalo “verde-bermello”, sendo sincronizados co outro grupo mencionado

2. Dita actividade semafórica sería discrecional, é dicir, faríase uso da nova regularización cando fose preciso, en horas de moito tráfico rodado.

Santiago, 4 de abril de 2008

Esquerda Unida denuncia o escuremento informativo do Concello de Santiago no tocante ao macrovertedoiro de Grixoa, na vella canteira de Miramontes

No Diario Oficial de Galicia de data 3 de xaneiro de 2007 figuraba un anuncio da Consellería de Medio Ambiente e Desenvolvemento Sostible no que se sometía a información pública a solicitude de autorización ambiental integrada para o proxecto de restauración do espazo natural Canteira Miramontes, lugar de Grixoa, promovido por Edafoloxía e Restauración do Contorno Galego, S.L: (Eyrega) [Clave 2006/0104 AIA / IPPC].

Hai que fixarse nestas datas (nadal de 2006) para saber moi ben que o anuncio dificilmente ía ser divulgado de forma suficiente. Desde ese afastado momento, e ata hoxe, non se soubo basicamente nada máis de forma pública por como se xestiona o acceso á información desde o Concello. Tivemos que agardar a mediados de marzo de 2008 para enterarnos a través da prensa que a solicitude recibía unhha declaración favorable por parte de Joaquín Lucas Buergo del Río, Director Xeral de Calidade e Avaliación Medioambiental (así consta no DOG do 3-01-07).

Esquerda Unida entende que se fixeron as cousas mal desde o Concello:

a) por non ser dilixentes e estar atentos a un proxecto que foi depositado nas Oficinas do Concello o 3 de xaneiro de 2007;

b) porque está demostrado que a comunicación entre a Xunta e o Concello fai augas;

c) por dicir nun primeiro momento, e como escusa defensiva, que non están enterados da existencia de tal proxecto (Marta Álvarez-Santullano sobre todo, xa que Elvira Cienfuegos dedicábase na anterior lexislatura aos asuntos Educativos, se ben non a exime de estar informada de canto afecta ao seu Departamento);

d) polo escurecemento informativo, xa que o Concello non só non convoca os órganos participativos existentes no Concello para dar a coñecer tal proxecto, senón que non responde aos veciños asistentes no Pleno;

e) porque a realización de tal proxecto representa a inutilidade da política de residuos existentes e supón non avanzar na reciclaxe e reutilización dos refugallos construtivos e outros;

f) porque a ampliación do vaso da canteira suporá a presenza do macrovertedoiro deste tipo máis amplo da toda a Comunidade;

g) porque o selado e a rexeneración non deberían ir condicionados a un negocio de dúas décadas, senón pura e simplemente a unha necesidade ecolóxica;

h) porque, no fondo, representa unha continuidade de negocio para ÁRIDOS CNC, empresa que subcontrata a EYREGA SL;

i) porque o alcalde non pode utilizar a existencia deste vertedoiro para avalar o peche doutro: isto vai en contra dunha boa xestión dos residuos non perigosos e en contra dunha boa política medioambiental e, desde logo, en contra do desenvolvemento da Axenda 21 Local;

k) porque converterá a estrada de acceso, a comarcal que leva ao Val do Dubra e Santa Comba, nun ir e vir de camións que dificultará máis a seguridade viaria e a fluidez do tráfico por esa pequena estrada;

l) porque nada garante a inexistencia de contaminación medioambiental e de filtración aos recursos do solo. Todo o contrario.

En síntese, Esquerda Unida está en contra da existencia deste proxecto tal como se concibe desde un primeiro momento e denuncia a ineficacia do Concello e a súa escasa dispoñibilidade por informar de forma veraz á cidadanía.

Santiago
Consello Comarcal
3-abril-2008

Sesión preparatoria da III Asemblea do Foro Galego de Inmigración e Emigración de Retorno

O sábado, a partir das 10h30 terá lugar no centro sociocultural de Fontiñas unha nova reunión preparatoria da III Asemblea do Foro Galego de Inmigración e Emigración de Retorno. Este ano celebrarase na cidade herculina, o 25 de maio, entre as 10h e as 17h30 e xa se ten confirmado o Forum metropolitano como lugar para a III Asemblea .

MERCADIÑO DE TROCO o Sábado 5 de abril

MERCADIÑO DETROCO

O sábado 5 de abril, entre as 11h e as 14h terá lugar na Praza da Igrexa da rúa de San Pedro, en Compostela, un Mercadiño de Troco organizado pola Asociación Ecoloxista VERDEGAIA.

En tempos nos que o único valor dominante é o que concede Don Diñeiro, destacan estas accións anticapitalistas e, no fondo, revolucionarias, xa que é poñer na práctica cotiá, na rúa, nas relacións sociais o valor do intercambio do uso, da necesidade.

Segundo nos informa VERDEGAIA haberá unha Sección especial para trocar obxectos de nenos e nenas entre 0 e 6 anos!

O horario previsto é o seguinte:

* De 11 a 13.30 -Recollida e exposición de obxectos
* De 13.30 a 14:00- Troco Máximo de 6 obxectos por persoa.

Os organizadores advirten que "só se admitirán obxectos en bo estado. O troco é un sistema de mercado no que prima o valor real das cousas baseado na súa utilidade, non o seu prezo en moeda. Supón unha reflexión previa sobre o que xa posuímos e as nosas necesidades reais, e pon en cuestión o valor dos cartos e o seu lugarna nosa sociedade, amosando un xeito á marxe do capitalismo para consumir"

Desde Esquerda Unida saudamos esta acción e animamos a todas as persoas concienciadas na necesidade de crear ese OUTRO MUNDO POSIBLE a que asistan a intercambien non só obxectos, senón a experiencia de ir contra o sistema.

LEILA KHALED, EMBLEMA DA LOITA DO POBO PALESTINO EN COMPOSTELA

O xoves 3 de abril, ás 20’00 h,
terá lugar no Paraninfo da
Universidade de Santiago de
Compostela unha charla a cargo
de Leila Khaled, unha
infatigable loitadora pola
liberdade do pobo palestino,
do seu pobo.

O acto está organizado por:
Galiza por Palestina,
Universidade de Santiago de
Compostela e Deputación da
Coruña.

Animamos a todas as persoas desexosas de coñecer de forma
non mediada o que acontece en Palestina a que se acheguen ao
Paraninfo.

Santiago, 29 de marzo de 2008

Moción "Creación dun Servizo de Mediación da Veciñanza

EXPOSICIÓN DE MOTIVOS

 En ocasións, os ritmos da vida cotiá conlevan a aparición
de conflitos de pequena intensidade entre veciños que se
poderían xestionar de forma civilizada e racional, impedindo
que se enquisten de forma negativa no xeito de percibir
tal relación e a propia convivencia.

Sendo esta unha cidade universitaria é moi habitual
que xurdan problemas relacionados co ruido. A canalización,
as máis das veces, faise de forma cáseque exclusiva a través
da denuncia policial, sen que se produza un diálogo entre as
partes confrontadas e sen que, no fondo, se chegue
á resolución do conflito.

Por iso, Esquerda Unida entende que é preciso un espazo
dirixido aos veciños da cidade, de carácter gratuíto, para a
resolución pacífica de conflitos. Trátase de fomentar o compromiso
cívico cidadán e reforzar a convivencia cun novo modelo para xestionar
as situacións conflitivas.

A mediación é un proceso de resolución de conflitos onde un
terceiro imparcial (o mediador) axuda aos implicados a buscar
alternativas para resolver o problema formulado, baseándose na
comunicación, o respecto e a colaboración das partes implicadas.

Os obxectivos deste novo servizo serán:
a) Prevención de conflictos;
b) Resolución antes do agravamento de conflictos entre veciños;
c) Resolución extraxudicial de problemas entre veciños;
d) Establecemento dun sistema público, universal, permanente e
gradual para a resolución de conflictos. 

A tipoloxía de conflito á que se dedicará serán:
a) Conflitos veciñais relativos á utilización de espazos e mobiliario público;
b) Conflitos de convivencia entre veciños;
c) conflitos de convivencia entre comunidades de veciños.

Quedarían excluídos deste servizo de mediación
os seguintes conflitos:
a) Conflitos intrafamiliares;
b) conflitos onde unha das partes sexa o Concello;
c) conflictos escolares.

As súas principais características sendo a gratuidade do servizo;
a rapidez; o carácter voluntario polas partes confrontadas;
a imparcialidade e a confidencialidade.

O Equipo profesional

Estará formado por avogados, sicólogos e traballadores sociais
especializados en técnicas de comunicación e xestión de conflitos
que axudarán guiando a negociación para chegar a un acordo sen
tomar decisións, sempre velando polo equilibrio.

Entre as súas funcións estará a de emitir un informe de carácter
anual sobre o funcionamento de dito servizo, onde consten datos
cuantitativos e cualitativos sobre o seguemento das distintas
resolucións adoptadas

Solicitude do servizo de mediación

Para o coñecemento do conflito habilitarase un teléfono gratuito
 para que unha ou ambas partes opten polo servizo de mediación.
Outras vías de solicitude serán: o informe de incidencia policial
co consentemento informado de ambas partes; a solicitude vía
enderezo electrónico dunha ou das dúas partes confrontadas.

 A opción da mediación non implica a imposibilidade de apelar
a outros recursos como a xustiza. Unicamente trátase de intentar
solucionar aquelo que nos preocupa e  molesta dunha forma razoable,
próxima e estable.

Nunha segunda fase, unha vez que o servizo de mediación xa teña
 consolidada a súa funcionalidade, e co fin de que a cidadanía poda
participar na observación e mesmo na conformación efectiva do servizo
 de mediación, o Concello poñerá en marcha Talleres de Formación en
resolución de conflitos para que as persoas que o desexen poidan
achegar a súa axuda ao propio servizo de mediación. 

En base ao anterior proponse ao Pleno do Concello de Santiago
que adopte o seguinte:

ACORDO

1.      Creación dun Servizo de Mediación Veciñal coas características
enumeradas e descritas na exposición de motivos.

Santiago, 28 de marzo de 2008

Valoración inicial sobre os resultados en Terras de Compostela

Remataron as eleccións máis polarizadas dos últimos anos. Polarizadas en primeiro lugar polos 4 anos de lexislatura, onde os logros acadados por IU foron silenciados e acaparados polo PSOE. Ese foi o primeiro punto feble na política cotiá. Pero, se é certo que a meirande parte dos nosos votos foron para PSOE, o maldito e noxento "voto útil" (que utilidade pode haber en negar a conciencia e destruir un proxecto de esquerdas), estas persoas non tiveron en conta esa febleza. A polarización segue no 4 PODER, os medios de comunicación que foron os verdadeiros creadores de opinión e instrutores do voto nestas eleccións ao negar espazo e visibilidade ao traballo -enorme traballo- que realizamos en toda Galicia. E resulta mesmo que en conversas mantidas con membros directivos deses medios recoñecían a dita polarización.....pois que a solucionaran. Está nas súas mans a destrución da pluralidade democrática e a consolidación dun bipartidismo á americana que dá medo. U-la esquerda en todo este proceso?

Nalgúns concellos de Terras de Compostela as cousas foron mellor para nós e por iso, este coordinador comarcal quere agradecer a todas as persoas que apoiaron o noso programa de esquerdas, realmente transformador.

• Na propia Compostela conseguimos 1263 votos (un 2,17%) máis menos o mesmo resultado que hai 4 anos e consolidando o resultado das municipais (1119 votos).

• En Ames 317 votos (2,17% tamén) 15 votos máis que hai 4 anos.

• En Brión, 63 votos (1,51 %), 13 votos máis.

• En Negreira 30 (0,68%) 3 máis

Noutros concellos como O Pino e Teo baixamos. En calquera caso, nesta zona foi unha das zonas onde mellor mantivemos o tipo fronte ao "tsunami" bipartidista.

Por iso, graciñas a todas as persoas porque a pesar de caer en Galicia e no Estado sabemos que temos un pequeno espazo e que debemos traballar para facelo máis grande para podermos denunciar os atropelos en materia social e medioambiental.

Mércores 12 de marzo, ás 20 h na Librería Couceiro

O vindeiro mércores 12 de marzo, facemos un debate sobre a Cidade da Cultura, na Libreria Couceiro de Compostela (Na Praza de Cervantes ou mellor dito Praza do Pan). É as 20.00 horas e falarán Sechu Sende,Bermejo e Redondo Abuín.

organiza a Plataforma Cultura Si,Mausoleo Non.

Cómpre que as persoas que aínda pensamos -a pesar da máquina bi(tri)partidista- na rectitude e na transparencia e que desexamos que se establezan mecanismos cidadáns de control do gasto público, que nos acheguemos á charla.